Duha ka esnatser gidemalas

CEBU, Philippines — Duha ka mga gipasanginlang esnatser ang nadakpan sa kapulisan atol sa ginukdanay human sila nanglabni duol sa usa ka establisyimento diha sa dalan Pope John Paul II, sa Barangay Mabolo sa Siyudad sa Sugbo kagahapon sa alas 5 sa buntag.

Ang mga suspetsado mao sila si Antonio Panlaan Malusay, 52,  usa ka habal-habal driver, lumad nga taga Barangy Sagay, Dakbayan sa Toledo ug ang kauban niini nga si Eugenio Canumay Santa Ana, 29, lumad nga taga Guihulgan City, Probinsiya sa Negros Oriental.

Samtang ang biktima usa ka 23-anyos nga babaye nga taga Barangay Sta. Cruz, Lungsod sa San Francisco, Isla sa Camotes ug usa ka Guest Relation Staff.

Sigon ni Police Major Romeo Caacoy, ang mga suspetsado sakay og motor nag-atang na daan sa lugar kun asa nahitabo ang insidente.

Dihang niagi ang biktima gikan sa trabaho gilabni nila ang bag niini.

Apan gigukod sila sa mga tawo sa lugar ug naswertihan nga dunay mga beat patrollers sa Mabolo Police Station nga dali sab niresponde hangtud nadakpan ang duha. Narekober sa kapulisan ang bag sa biktima nga dunay sulod kwarta nga P3,800 ug Postal ID niini.  Gikatakda nga pasakaan og kaso ang mga suspetsado. --  IBM BANAT NEWS