98 porsiyento sa mga magtutudlo ug mga non-teaching staff sa DepEd-7 bakunado

CEBU, Philippines — Gibutyag sa director sa Department of Education -Central Visayas nga si Dr. Salustiano Jimenez nga 98% na sa ilang mga teaching ug non-personnel sa mga pampublikong eskwelahan sa rehiyon ang bakunado na batok COVID19.

Atol sa OpenLine News Forum sa MyTV, gitataw ni Jimenez nga padayon ang ilang pagkumbinser sa nahibilin nga 2% nga magpabakuna gyud.

“Ang uban niini kay nahadlok, ang uban niini kay dili pa kumbinsido. Apan wala gyud mohunong ang DepEd sa pagdasig kanila,” matud pa ni Jimenez.

Hinuon kadtong mga personnel nga wala magpabakuna kay giawhag lang nga magdala gyud og negatibong resulta sa antigen o RTPCR test matag duha ka semana.

Dinhi sa Central Visayas, ang teaching ug non-teaching personnel kay moabot ngadto sa kapin 82,000.

Gitataw ni Jimenez nga makatrabaho gihapon ang ilang mga personnel nga dili bakunado apan temporaryo kini nga dili  pahupton og klase ug idestino lang una  sa ubang gimbuhaton sama sa pag-check ug pag-andam sa mga module.  Nasayran nga pabilin nga limitado ang face-to-face nga klase busa dunay ubang tinun-an mga nag-module gihapon.

Gipaneguro gyud sa DepEd nga mahimong luwas ang kabataan sa ilang pag-eskwela ug layo kini sa COVID19.

Una na nga nabalita dinhi sa Banat News sa miaging adlaw nga walay kaso  sa mga tinun-an sa  pampublikong eskwelahan dinhi sa Central Visayas nga nataptan og COVID19  sukad gisugdan ang limited  face-to-face classes.

Gibutyag ni Jimenez nga ang maong sitwasyon nagpakita nga wala gyuy transmisyon sa COVID19 nga nahitabo sa mga eskwelahan ug nagpakita kini nga nituman gyud ang tanan sa gilatid nga protocols.

Kahinumdoman nga niabot na og 91% ka mga pampublikong tunghaan sa Rehiyon 7 ang nakasugod na sa limitado nga pisikal nga klase. Ang nahibilin nga 9% kay kasamtangan pa nga ni-proseso sa requirements ug kasagaran niini kadtong mga eskwelahan nga dagko ug daghan kaayo og mga tinun-an. — /IBM (BANAT NEWS)