Pagban sa poultry products dinhi sa Sugbo ipadayon

CEBU, Philippines — Ipadayon sa Kapitolyo ang pag ban sa pagsulod og live poultry ug wild birds nganhi sa Probinsya sa Sugbo gikan sa mga lugar nga adunay kaso sa bird flu.

Si gobernador Gwendolyn Garcia niluwat og executive order no 14 pag patuman og ban sa pagpasulod og live birds (poultry ug non-poultry) lakip na ang “day-old chicks, day-old pullets, ready-to-lay pullets, ducks, quails, game fowls, pigeons ug pet birds” gikan sa Luzon, Mindano ug mga nasud nga apektado na Avian Influenza.

Ang pag byahe sa mga live birds nga gikan ra sa Visayas area mahimong makasulod sa Probinsya apan kinahanglan adunay mapakita nga mga dokumento.

Kini naglakip sa Veterinary Health Certificate gikan sa Provincial Veterinarian, veterinary shipping permit nga gi-issue sa Bureau of Animaly Industry/deputized veterinary quarantine officers; ELISA/ HI/ RT PCR Negative laboratory test result sa avian influenza; certification AI-free status nga gi-issue sa Provincial Veterinarian nga walay outbreak sa avian influenza kon asa nag gikan ang maong live birds o langgam sulod sa pito ka adlaw; ug Land Transport Permit nga gi-issue sa DENR alang  sa wild ug domestic birds.

Sa mga poultry meat products sama sa domestic poultry meat, imported poultry meat ug processed poultry ug canned poultry products itugot kini nga makasulod apan kinahanglan ang shipper o trader makapakita og meat inspection certificate nga gi-issue sa National Meat Inspection Service (NMIS) ug veterinary shipping permit.

Sa mga processed poultry products kinahanglan sab makapakita ang shipper o trader sa license to operate ug certificate of product registration gikan sa Food and Drug Administration (FDA).

Ang mga itlog sama sa balut, table eggs, salted eggs, quail eggs ug hatching eggs itugot sab ang pag transport niini kun adunay veterinary health certificate, veterinary shipping permit,  ug RT-PCR negative test sa avian influenza.

Ang mga imported poultry gikan sa mga nasud nga walay kaso sa avian influenza makasulod apan kinahanglan adunay dokumento sama sa SPS import clearance, landing permit, notice of quarantine ug veterinary shiping permit ug adunay koordinasyon sa Cebu Provincial Veterinarian.

Ang maong EO ni Garcia epektibo ni kagahapong adlawa Mayo 24, 2022. MEL (BANATNEWS)