Kasong perjury batok ni Chan gibasura

CEBU, Philippines — Gi-dismiss sa buhatan sa piskalya sa Siyudad sa Lapu-Lapu ang kasong perjury nga gipasaka sa pito ka mga barangay kapitan batok kang Mayor Junard ‘Ahong’ Chan ug lain pang lima ka mga opisyal sa kagamhanan sa siyudad.

Gipasaka ang maong kaso sa buhatan sa piskalya sa maong dakbayan niadtong Marso 23, 2022 human nila gikwestyon ang pagpamalit ni Chan og mga pagkaon ug galamiton para sa Covid-19 response sa siyudad gikan sa gihulagway nilang dili kwalipikadong kumpanya.

Naglakip sa mga opisyal nga nipasaka og kaso kang Chan mao sila si ABC president Eduardo Cuizon sa Barangay Bankal, Eleonor Fontanoza sa Barangay Gun-ob, Regina Ybanez sa Barangay Looc, Triponia Abayan sa Barangay Tungasan, Joselito Tibon sa Barangay Suba Basbas, Reynaldo Tampus sa Barangay Canjulao ug Rosalino Abing sa Barangay Maribago.

Gawas kang Chan, nalakip sa gikasohan og perjury sa mga kapitan silang Atty. James Allan Sayson, Nagiel Banacia, Claire Cabalan, Ma. Annabeth Cuizon ug Romeo Berame.

Apan ang piskalya wala nakakita og igong basihan aron ipasaka ngadto sa korte ang kasong perjury batok kang Chan ug kaubanan tungod kay ang gikwestyong kumpanya nga nagsuplay sa mga pagkaon ug uban pang galamiton alang sa Covid-19 response nakapakita og kamatuoran nga mahimo sab silang mosuplay niini.

Ang maong kompanya mao ang Heritage Muebles Mirable Export Inc. nga naila sab nga supplier og furnitures. Ang maong mga kapitan gisumbalik og kiha ni Chan og Grave Oral Defamation in relation to Cyberlibel may kalabotan sab sa maong kaso nga namasangil sa mayor og iregularidad sa pagpamalit sa mga ayuda para sa mga tawo atol sa pandemic, butang nga gihimakak sa mayor.

Ang mga kapitan nalutsan og warrant of arrest ug gisikop sa CIDG-7 sayo niing semanaha ug nakabutang na og piyansa. —IBM (BANATNEWS)