Lalaki patay sa buy-bust operation

CEBU, Philippines — Patay ang usa ka lalaki nga gialegar nga nalambigit sa illegal nga drugas human kini gikatahong namusil sa kapulisan atol sa operasyon sa mga sakop sa Cebu City Police Office Drug Enforcement Unit sa may Sitio Sidlakan, Barangay Tisa, Miyerkules sa gabii.

Ang nakalas mao si Ralf Tejares taga A. Lopez apan kasamtangan nga nagpuyo sa maong lugar.

Matud pa ni Police Lieutenant Colonel Wilbert Parilla, Deputy Director for Operation, miadto ang mga polis sa lugar aron i-validate ang mga impormayong dunay bag-ong personalidad nga namaligya og ilegal nga drugas sa lugar.

Sumala pa ni Parilla gipalitan unta og ilegal nga drugas ang suspek apan nakabantay kini nga polis ang katransaksyon maong midagan apan namusil sa mga operatiba hinungdan nga kini nabawsan ug napatay.

Si Parilla miingon nga si Tejares makabaligya og tagsa ka kilong shabu matag semana. Atol sa maong operasyon dunay nakuhang gituohang tunga sa kilong shabu gikan sa namatay.

Nasuta sab sa imbestigasyon nga dunay mga igsuon ang namatay nga nagtingkagol karon sa prisohan tungod sa kalambigitan sa illegal nga drugas.

Samtang dul-an P3.6 milyones nga gituohang shabu ang nasakmit sa Cebu City- City Drug Enforcement Unit diha sa Fernandez Compound sa Sitio Banawa, Brgy. Guadalupe.

Nadakpan sa operasyon sila si Iveen Migabon Pedrano 23, Eugene Belamia Arces,22, ug Bernadeth Malubay Baslag,23, ug nakuhaan og sobra tunga sa kilong gituohang shabu.

Sa laing operasyon, nangadakpan manag-agaw nga Ace Vergel Caballero Abari,35, ug Angelbert Abari,23, atol sa operasyon nga gilusad sa mga sakop sa Talisay City Police Station Drug Enforcement Unit diha sa Dawis St., Barangay Dumlog kagahapon sa kaadlawon.

Ang subject sa operasyon mao ang maguwang nga Abari kinsa matud pang Police Lt. Elwood Ebona  napriso na kaniadtong tuig 2016 tungod gihapon sa ilegal ng drugas. Nakuhaan kini og 15 gramos nga gidudahang shabu.

Samtang ang iyang ig-agaw nga si Angelbert naatlan nga nipalit og shabu hinungdan nga naapil sab kini sa pagkasikop.— Romeo Marantal, Gabriel Bonjoc/IBM (BANATNEWS)