P40m shabu nasakmit atol sa SACLEO

CEBU, Philippines — Sa gilusad nga Simultaneous Anti-Crime Law Enforcement Operation (SACLEO) lukop Central Visayas sugod alas 12:01 sa kaadlawon sa adlaw na nga Sabado nga natapos sa alas 12:00 sa kaadlawon karong adlawa (Domingo) mokabat na sa kapin sa P40 milyones nga balor sa drugas ang nasakmit sa kapolisan sa dakbayan sa Sugbo ug dakbayan sa Talisay.

Labing dako nga nasakmit ang kapin sa lima ka kilong gidudahang shabu  gikan sa manag-agaw nga taga Barangay Ermita ning Siyudad sa Sugbo nga silang Shelljay Cintino Cuyno ug Dennis Centeno pulos 24 anyos.

Ang duha nadakpan sa grupo ni Police Major Jonathan Bethoven sa City Drug Enforcement Unit sa Cebu City Police Office diha sa dalan Panganiban Barangay Pahina Central.

Matud ni Taneo nga gipalitan nila ang managagaw og 125 gramos, apan atol sa pagdakop nagdala sab sila og laing mga drugas nga matud pa padung nilang ihatud.

Moabot ngadto na sa 5,125 gramos o kapin sa lima ka kilo ang shabu nga  nasakmit nga mokantidad og P34.8 milyones sa street value.

“Dako ni nga accomplishment, kay kun na dispose ni, daghan gyud ang maboang ani kun nabaligya ni,” matud ni Police Lieutenant Colonel Ryan Devaras, deputy city police director for operations sa CCPO.

Sumala pang Devaras, ang duha mibutyag nga duna pa silay laing gikasabot nga hatdan sa maong mga drugas nga usa ka ginganlan og Pastor Gonzales ug suholan sila og tag P10 mil kada kilo nga mahatud.

Sumala pa sa duha bag-ohay pa lang sila aning paghatud-hatud og mga drugas nianang tawong ilang gihinganlan. Si Shelljay kanhi delivery food rider samtang ang ig-agaw niini e-bike drayber usab.

Sa laing drug-bust sa mga sakop sa Labangon Police Station gipangulohan ni Police Major Janelito Marquez nakasakmit usab sila og kapin sa tunga sa kilong gituohang shabu nga mokantidad og P4 milyones.

Ang nadakpan mao si Jaime Villahermosa alyas Jimmy  53, taga Sitio Laguna sa Barangay Basak Pardo ning Siyudad sa Sugbo.

Si Villahermosa nadakpan sa Pleasant Homes sa Barangay Punta Princesa kun diin gihimo ang transaksyon.

Matud ni Marquez nga si Villahermosa napriso na kaniadto tungod gihapon sa ilegal nga drugas.

Alas 3:00 pasado sa kaadlawon sa laing pagpangronda  ang gihimo diha sa Sitio Puntod, Brgy. Mambaling sa Cebu City nga niresulta sa pagkasikop sa manag-amahang Sarsari Lakit Esnani ,44, ug Boyet Jamani Esnani ,21, pulos mga mananagat.

Nakuhaan sila og 40 gramos nga gituohang shabu nga mobalor ngadto na sa dul-an P300 mil.

Samtang sa dakbayan sa Talisay, tulo ka pagpangronda sab ang gihimo sa DEU-Talisay City Police Station pinangulohan ni Police Lt. Elwood Ebona niresulta sa pagkasikop ni Davisrise Granada Espinosa 18, alyas Paok, taga Nazareth, Barangay Buhisan diha sa gawas sa Vista Grande sa Barangay Bulacao.

Nakuha gikan kaniya ang gituohang shabu nga gibanabang mokantidad og P1 milyon.— Gabriel Bonjoc/IBM (BANATNEWS)