Pumpboat nalunod, usa missing

CEBU, Philippines — Siyam ka tawo ang naluwas ug usa ang padayon pa nga gipangita human usa ka motorbanca ang nalunod diha sa Hilutongan Channel sakop sa Dakbayan sa Lapu-Lapu, alas 2:16 sa kaadlawon kagahapong adlawa.

Ang Seaborne Cargo 5 nga padulong sa Tagbilaran Port maoy nakabanggal sa nalunod nga motorbanca ug giluwas ang walo ka mga tawong sakay niini.

Human nadawat sa CGS Central Cebu ang tawag sa radio gikan sa maong barko gipadala dayon ang MRRV 4406 ug CG-Medical Team ug gilusad ang search and rescue operations.

Base sa pangangkon sa usa sa mga naluwas nga pasaherogikan sila sa Olango Island padulong sa Lapu-Lapu sa dihang nakasugat ug dagkong balod nga nisulod sa ilang luwang hinungdan nga sila nalunod.

Adunay duha ka mga pasahero ang giingong nilangoy aron mangayo ug tabang sa ilang kahimtang.

Atol sa pag-rescue sa mga pasahero, giingong walo ang nadala sa Seaborne Cargo 5 nga padung sa Bohol, ang usa nakit-an ra nga maayo ang didto na sa kadagatan sa may Punta Engaño sa Dakbayan sa Lapu-Lapu, apan ang usa padayon pa nga gipangita hangtud ning pagsuwat sa balita.

Matud pa ni Coastguard Lt.JG Erick Salcedo, tigpamaba sa CG Visayas, napulo ang sakay sa maong pumpboat lakip na ang operator niini diin usa pa ang padayong gipangita tungod kay missing.

Kadtong walo ka nga na rescue nga nadala sa Bohol miabot sa Sugbo alas-6 sa kagabii.

Giila ang mga naluwas nga mao sila si John Lord Tamsi,17; Dennis Goden,30; Alex Padilla,38; Giovanni Amistad,30; Montano Paroco,52; Chunguyan Casquejo,30; Cleto Limosnero,57; Jose Rex Caldernon,48; ug Arnel Balingit,43.

Samtang ang missing mao si Jefrel Butalid,28, taga San Vicente, Olango Island. Tungod sa dautang panahon gihunong ang pagpangita kaniya.

OIL SPILL

Samtang sa lungsod sa San Fernando, gibutangan og oil spill boom ang lugar kung diin naunlod ang duha ka mga barko human wala na mobalik og lutaw gikan sa dakong hunas pagbalik og taob sa dagat niadtong Lunes sa kaadlawon.

Ang oil spill booms panagana sa coastguard kun pananglitan moawas ang petrolyo gikan sa makina ug tangke sa maong mga barko aron dili mokatag sa dagat.

Si Romeo Alfeche Jr., usa sa mga rescuers sa MDRMMO sa lungsod sa San Fernando nitug-an nga padayon nilang monitoron ang lugar ilabi na ang oil spill.

Hinuon ang shipyard layo ra sa nahimutangan sa marine sanctuary sa lungsod. —Decemay Padilla/IBM (BANATNEWS)