Raffy Tulfo gustong dunay random drug test sa kandidato

CEBU, Philippines — Pabor si senatorial aspirant ug beteranong magsisibya Raffy Tulfo nga hugtan sa Commission on Election (Comelec) ang mga rekisitos para sa mga mokandidato matag piniliay, gusto niya nga himuong mandatory ang random drug testing para sa mga gustong magpapili.

Si Tulfo kinsa nia karon sa Sugbu miingon nga ang drug testing dili lamang pinaagi sa urine sample kondili adto gayod sa lugas sa buhok o hair folicles sa kandidatong magpa-drug test.

Si Tulfo nagtuo nga duna gyuy mga kandidatong tiggamitan og ilegal nga drugas, apan nasayod kun unsaon pagkuha sa sistema niini ang drugas pinaagi sa pagtumar o pag-inom og mga pangpalimpyo niini aron kun i-drug test mag-negatibo sila.

Apan kun ipaagi sa hair follicles ang kuhaong sampol sa ipa-drug test dili kini daling matangtang tungod kay magpabilin ang lama sa drugas sud sa dugay nga panahon diha sa buhok.

Ang gipasabot ni Tulfo nga bisan tuod mga ma-clear sila sa drug test pinaagi sa ihi, dili pasabot nga mohunong na kini sila sa paggamit og ilegal nga drugas.

Ilaha gihapon kini buhaton ini og kadaog na nila sa gidaganang pwesto.

Sa pikas bahin, sa pagbalik sa mga surpresang drug test sa

City Office for Substance Abuse Prevention (COSAP), upat dayon ka mga empleyado sa Cebu City Hall ug laing usa ka barangay worker ang nagpositibo sa pagamit og shabu.

Suma pa sa hepe sa COSAP nga si Jonah John  Rodriguez nga ang upat l nga nag-positibo, ang tulo niini kay nagikan sa City Agriculture Department (CAD), job order , regular ug casual nga empleyado.

Samtang ang usa gikan sa Mayor’s Office nga gibutang  isip job-order sa Division for the Welfare of the Urban Poor (DWUP). Usa ka loader sab sa Barangay San Jose ang nagpositibo pud.

Ang mga nagpositibo ipaubos sa legal process diha sa  City Legal Office (CLO) sama sa paghimo og confirmatory test didto sa  Manila.

Ang regular employee hatagan  og kahigayonan nga i-enroll sa rehabilitation center  nga nahimutang didto sa Argao.

Gipanawagan sa COSAP ang tanang empleyado sa city hall ug barangay nga kinahanglan nga dili gyud mosulod og dautang bisyo gumikan kay makaapekto gyud kini sa ilang trababaho.

Ang pagpahigayon og  surpresang drugtest kay pinasubay sa City Ordinance 1829. —IBM (BANATNEWS)