Mga pensiyonado gidasig pagpahimulos sa SSS loan program

CEBU, Philippines — Gidasig sa SSS Danao branch ang mga pensiyonado nga mopahimulos sa ilang gilusad nga Enhanced SSS Loan Pension Program alang sa mga retiree pensioners. Base sa ilang advisory mamahimo nga makahuwam og kwarta ang mga pensioners pinaagi sa ilang pag-file niini sa online og dili na kinahanglan moadto pa sa buhatan sa SSS. Gipadali nila ang proseso sa pag-loan ning panahon sa pandemic, ilabi na kay namatikdan nga sagad sa mga pensioners adto manghuwam sa mga “loan sharks” ug i-prenda na ang ilang mga ATM cards isip kolateral.

Nasayran gilusad ang maong loan program sa SSS agig pagsanong usab sa hangyo sa mga pensiyonado ug aron makatabang sa mga retiradong pensiyonado pinaagi sa pagpautang nga dunay ubos nga interes. Mahimong maka apply sa loan program mao kadtong nag-edad og 85 anyos paubos sa kataposang termino sa pagpautang, wa kuhai ang binuwan nga pension sama sa nahibiling balanse sa ubang pautang sa SSS ug uban pa.  Alang sa dugang kasayuran mahimong mo-contact sa SSS Danao Branch (032)3409200 Hotline#: 09310144667. MEL (BANATNEWS)