Eskedyul hangyoong di ipadayon

CEBU, Philippines — Planong pagpatuman og barangay scheme sa pagpangompra og sagol sa binignit diha sa Carbon Public Market mas makapasamot sa problema ug mahikawan sab ang mga nanginabuhi pagpaninda sa kitaon atol sa Semana Santa. Mao kini ang nakita ni Cebu City Market Operations Division Chief Irvin Cabales maong  gihangyo niya karon si Mayor Edgardo Labella, ang Emergency Operations Center Cebu City ug ang Cebu City Police Office (CCPO) nga kanselahon ang maong plano.

Nakita sab sa MOD adunay mga mangomprahay gikan sa laing lugar nga binulto kun mangompra sa Carbon anang mga adlawa nga dili na hinuon makasulod. Nagtuo si Cabales nga dili na mausab ang nahitabo sa miaging tuig. Ang gipasabot niya mao kadtong “binignit frenzy” diin nagdasok ang mga tawo ug wala na mosunod sa health protocols. Masaligon siya nga ang mga vendors mismo motabang aron mapatuman kini. Malaumon siyang tugotan sa mayor ang iyang hangyo tungod kay mao ra kining panahona nga mokusog ang halin sa mga vendors. Aron mas daling maluag ang merkado, plano sa MOD nga himuong tulo ang entrada ug gawasanan sa maong merkado.

Gipatawag na sab ang mga manindahay ilabi na ang namaligya og sagol sa binignit nga parehason tanan ilang presyo ug kinahanglang magkatag sila aron dili maghuot sa usa ka lugar ang mamalitay.

Ang Oplan Semana Santa magsugod Marso 30 hangtod sa Abril 3. Gihulagway ni Cabales nga kritikal ang adlaw nga Huwebes Santo tungod kay anang adlawa gyud mokusog ang palit sa sagol sa binignit. —IBM (BANATNEWS)