Bike lane sa Mandaue 60 porsyento na nga nahuman

CEBU, Philippines — Ang phase 1 sa giugmad nga bike lane sa kagamhanan sa Dakbayan sa Mandaue ug buhatan sa Department of Public Works and Highways (DPWH) 7 anaa na sa 60 porsiyento ang nahuman.

Kini ang gitug-an ni Atty Eddu Ibañez, executive secretary ni Mayor Jonas Cortes.

Matud pa ni Ibañez nga lakip karon sa gihimo mao ang pagpahimutang sa bollards ug concrete barriers nga gipahimutang sa mga karsada nga naapil sa phase 1 sa gitrabaho isip mga bike lane.

Naapil sa maong plano mao ang Ouano Avenue, A.C. Cortes, Mantawi Drive ug ingon man tipik sa dalan Rizal.

Ang concrete barriers ug plastic bollard ang gipahimutang ngadto sa mga dalan nga maoy namatikdan nga sagad kusog managan ang mga sakyanan.

Gitataw  ni Ibañez nga ang second phase sa bike lane mao na ang pagpahimutang sa mga bike rocks, bicycle parking sa publikong lugar, bicycle repair stations ug paint markings sa sudlonon nga mga dalan sa maong dakbayan. MEL (BANATNEWS)