Libreng kolehiyo sa TCC paningkamotan nga mapadayon

CEBU, Philippines — Daku ang pagsalig ni mayor Gerald Anthony “Samsam” Gullas Jr. nga magpadayon nga mapahimuslan sa mga tinun-an ang Talisay City College (TCC) nga mohatag og libreng pagtungha.

Kini human ang Board of Trustees (BOT) ug kadagkuan sa tunghaan paspas nga nakahimo sa mga butang nga gipangayo sa Commission on Higher Education (CHED) aron mapabilin ang suporta pinansyal sa nasudnong pangangamhanan.

Nahibaw-an nga adunay mga rekisitos nga gipangayo aron mapabilin ang benepisyo hinungdan si Gullas nipatawag dayon og tigum. Nasayran, ang TCC usa sa mga tunghaan sa unang distrito nga nitanyag og libreng tuition fee human gitagaan og pagtugot sa nasudnong pangagamhanan

Si Dr. Richel Bacaltos, presidenti sa TCC nibutyag nga gitagaan sila hangtud sa Marso sunod tuig sa pagkuha sa mga rekisitos nga gikinahanglan ug siya masaligon nga makuha kini nila ug mapabilin nga libre ang pagtungha sa mga tinun-an.  Matud pa ni Bacaltos nga moabot sa 5 mil kapin ang ilang mga tinun-an nga dili lang taga Dakbayan sa Talisay tungod kay midawat sab sila gikan sa kasikbit nga lungsod ug siyudad.

Sama sa ubang tunghaan, ila sab gipatuman ang bag-ong paagi sa pagtudlo nga mao ang modular samtang naa pa ang pandemya. —MEL  (BANATNEWS)