Lalake gidunggab atol sa fiesta sa inayawan
CEBU, Philippines — Patay ang usa ka 33 anyos nga lalaki human kini gidunggab sulod sa ilang balay samtang nagsaulog sa ilang kapistahan alas sais y media sa gabie adlaw nga Domingo sa may Sitio Dumpsite, Barangay Inayawan ning Dakbayan sa Sugbo.
Ang nakalas naila nga si Renato Roquera, minyo, residente sa maong lugar.
Samtang ang suspetsado naila nga mao si Frankie Rafols, hingkod ang pangidaron ug silingan sa biktima
Matud pa ni Police Staff Sergeant Kristian Talam, Desk Officer sa Pardo Police Station, base sa initial nga imbestigasyon, giingong diha sa sulod sa ilang balay ang biktima ug sa walay daghan storya, kalit kini nga gidunggab.
Ang biktima dali unta kini nga gidala sa Cebu City Medical Center, apan gideklarar kini nga dead on arrival.
Gitug-an ni Talam, gipaubos pa karon sa imbestigasyon ang giingong hinungdan sa pagpanunggab nga niresulta sa kamatayon ni Roquero, ilabi na base sa estorya sa pipila ka mga tawo, suod nga higala ang duha. Si Talam, nitug-an sa pagka karon blangko pa ang kapulisan sa motibo sa pagpatay ni Rafols kang Roquero.
Pipila sa mga residente sa lugar ang nihulagway sa biktima nga buotan ug maayo nga tawo.
Ang suspek nga si Rafols nasikop ra usab dayon human sa maong insidente ug nagtingkagol na sa bilangguan ug gipaabot ang pagpasang-at ug tukma nga kaso batok niini. /MEL (BANATNEWS)
- Latest
