Mga polis sa high risk areas ipaubos sa swab test

CEBU, Philippines — Pabor si Cebu City Mayor Edgardo Labella sa panawagan ni Police Regional Office 7 Director General Albert Ignatius Ferro nga ipaubos sa swab test ang mga polis nga duty ilabi na sa mga high risk nga lugar.

Matud ni Labella nga sayud siya nga exposed ang mga frontliners sa risgo ilabi na sa ilang trabaho hinungdan nga kinahanglan sila hatagan og pagtagad.

Pabor si Labella nga adunay testing nga ipahigayon sa kapolisan ug sa ubang frontliners.

Dugang ni Labella nga makig-alayon siya sa pangulo sa kapolisan alang sa tinguha niini sa pagpahigayon og test sa mga polis.

Si Ferro nanghinaut nga mapaubos sa swab test ang iyang mga sakop kinsa anaa nag-duty sa mga barangay nga adunay mga kaso sa COVID-19.

Apan buot ni Ferro nga iprayoridad lang ang mga polis nga adunay gipakita nga sintomas sa COVID-19.

Kini tungod sab sa limitado nga testing kits alang sa Dakbayan sa Sugbo nga mas angayan nga hatagan og pagtagad ang mga residente nga nanginahanglan nga ipaubos og rapid testing.

Base sab sa talaan sa Regional Health Services, aduna nay 12 ka polis sa Central Visayas ang gipakuhaan og swab alang sa test human nga nakitaan og sintomas nga gitawag og influenza-like-illness.

Dugang ni Ferro nga daku sab kini nga tabang ngadto sa kapolisan ilabi na nga mawala sab ang ilang kabalaka nga matapnan sila samtang nanarbaho. Sheriza Mae R. Uy/GMR (BANATNEWS)