Tribu Basakanon nangharos

CEBU, Philippines — Walay paglubad, mao kini ang mahulagway sa nabantog ng Lumad Basakanon sa Barangay Basak San Nicolas sa Dakbayan sa Sugbo nga napiling Tribu sa Kabataan 2020 grand champion batok sa kaparehas sab nila ka maayong contingents gikan sa nagkadaiyang barangay sa siyudad.

Napulo ka mga lain laing barangay ang nagtigi sa korona kagahapon apan migawas nga ang Lumad Basakanon maoy milangkat sa Best in Street Dancing, Best in Musicality ug gipili nga Best in Costume nga nakadaog sa kantidad nga 570,000.

Ang Basak San Nicolas nidaog sab sa Ritual Showdown, samtang gisundan kini sa Barangay Labangon ingon 2nd placer; Ang Barangay Guadalupe 3rd placer; Ang Barangay San Nicolas Proper sa ika-upat; Ang Barangay Budlaan sa 5th placer; Ang Barangay Cambinocot ika-6 nga placer; ug Barangay Mabolo sa ika-7 nga puwesto.

Misaksi sa pasundayag si Cebu City Mayor Edgardo Labella sa Cebu City Sports Center. Gidayeg sa mayor ang tanang contingents alang sa ilang maayo nga performance bisan pa sa pagbundak sa ulan panahon sa grand parade ug sa kompetisyon mismo.

Ang mga Lumad Basakanon bisan og dunay mga bag-ong dancers ug miyembro sa grupo dili na bag-o kanila ang maong kompetisyon sa Sinulog. Sukad pa niadtong 1990s nisalmot na sila sa matag tuig ug makadaghan ng midaog isip grand champion ug nirepresentar pa sa Cebu City sa Aliwan Festival didto sa Manila diin sila sab maoy napiling grand champion.

Ang Lumad Basakanon ang unang grupo nga nakasulod sa Hall of Fame sa Aliwan Festival nga usa ka nasyonal nga kompetisyon sa mga pista gikan sa tibuok nasud, dili lamang sa lokal, apan giila usab sila sa internasyonal.

Niadtong 2017, nakuha nila ang internasyonal nga pag-ila human nakadaog sa ikatulo nga pwesto sa World Wonju Dynamic Dance Festival sa Wonju, South Korea diin kini ang labing unang higayon alang sa Sinulog Festival nga ipasundayag sa gawas sa nasud.

Ang Tribu sa Kabataan kaniadto nailhan nga Sinulog sa Kabataan sa Dakbayan nga usa ka kompetisyon nga gibase sa eskuylahan apan giusab kini ngadto na sa kompetisyon tali sa mga kabataan gikan sa nagkadaiyang barangay sa siyudad.

Apan karon, dili na barangay kondili gibase na sa komunidad.

Ang premyo sa Street Dancing:1st (P70,000) - Barangay San Nicolas

2nd (P50,000) - Barangay Labangon; Ika-3 (P30,000) - Barangay San Nicolas Proper; Ika-4 (P20,000) - Barangay Guadalupe; 5th (P10,000) - Barangay Cambinocot.

Sa Best in Musicality ang premyo: 1st (P50,000) - Barangay San Nicolas; 2nd (P35,000) - Barangay Guadalupe; Ika-3 (P25,000) - Barangay Labangon ; Ika-4 (P15,000) - Barangay San Nicolas Proper; ug 5th (P10,000) - Barangay Budlaan. /IBM (BANATNEWS)