Dul-an P10 milyones shabu sakmit sa 3 ka siyudad

CEBU, Philippines — Mokabat sa P5 milyones nga kantidad sa shabu ang nakuha gikan sa 15 ka high-value target ug 31 ka adik sa gihimong Oplan Limpyo Talisay sa tulo ka barangay sa Dakbayan sa Talisay kagahapon sa kaadlawon.

Si Police Major Gerard Ace Pelare, hepe sa Talisay City Police Station, nibutyag nga dungan ang ilang gihimo nga operation diin 13 gyud ka dakop ang ilang gihimo.

Target sab nila ang pamilyang Oberero nga maoy usa sa labing daku nga supplier og shabu sa dakbayan.

Ang mga nasikop mao sila si Jemely Obrero ug kauban sa Sitio Sambagan, Tangke; Ryan Paul Soriano ug laing tulo ka kauban ug usa ka menor de edad sa Sitio Nonoc, Tabunok; Niño Bacacao Dejacto nga taga Sitio Sambagan, Tangke; Argie Vinculado nga taga Sitio Sambagan; James Pogoy Labajo alyas Sadam ug iyang tulo ka kauban.

Heartinie Padigos Obrero ug tulo ka kauban sa Sitio Sawsawan, San Roque; Amalia Padigos Obrero ug walo ka kauban sa Sitio Nonoc, Marlo Cabando Gabisay sa Sitio Sambagan; Jhanela Reyes Gonzales sa Sitio Sambagan; Maria Ailyn Cabardo Labajo ug upat niya ka kauban sa Sitio Sawsawan; Christian Paul Abejo ug tulo ka kaubang sa Sitio Sawsawan; Junel Moron Austria sa Sitio Sambagan; ug Japet Abapo ug tulo ka kauban sa Sitio Sawsawan.

Niabot sa 46 ka personalidad ang nasikop nga giusa karon sa prisohan.

Nitimbang og 800.53 gramos ang tanang nasakmit nga shabu nga balor og P5,443,604. Si Pelare nagkanayon nga tulo ka magsuong Obrero ang ilang nasikop lakip na ang ilang inahan.

Si Col. Roderick Mariano, direktor sa Cebu Provincial Police Office, ug si Mayor Gerald Anthony “Samsam” Gullas Jr. personal nga nisusi sa operasyon nga gihimo.

Samtang sikop sa buy-bust operation alas 6:05 sa hapon niadtong Biyernes sa Sitio Alumnos, Basak San Nicolas, Siyudad sa Sugbo si Steward Mabitag Cabrera, 38, kinsa nakuhaan og shabu nga balor og P218 mil.

Lain nadakpan sa maong operation alas 11:30 sa gabii sa maong adlaw sa Barangay Ermita mao si Albrin Barsenas, 38, kinsa nakuhaan og shabu balor og P204 mil.

Sabado sa tungang gabii sa Sitio Menulida, Calamba nasikop sila si John Vladimir Cebes alyas Opao, 18, taga Purok 3, Camputhaw nga maoy target sa operation ug Nataniel Comodas Alimorin, 46, nagpuyo sa Sitio Bagumbayan, Tinago.

Ang mga dinakpan nakuhaan og kapin P1.5 milyones nga balor sa shabu.

Laing nadakpan sa Block 7, Barangay Sawang Calero mao si Randy Perez Demisilio, 32, kinsa nakuhaan og balor P918 mil nga shabu. Sa kinatibuk-an mokabat sa 452.1 gramos sa shabu ang nasakmit nga mobalor og P3 milyones.

Sa laing bahin gitanggong na sa detention cell sa Mandaue City Police Office ang usa ka negosyante nga nadakpan sa buy-bust operation sa Ibabao-Estancia sa maong dakbayan alas 2 pasado sa niaging kaadlawon kinsa nasakmitan og shabu nga nagkantidad og P104,000.

Si Police Lieutenant Colonel Franco Rudolf Oriol nga maoy hepe sa City Intelligence Branch sa MCPO niila sa dinakpan nga si Rajhnie Go, 33, ug kauban nga si Kennedy Caros, 19, taga Barangay Mabolo, Dakbayan sa Sugbo.

Matud ni Oriol nga si Go ilang gikonsiderar nga HVT base sa gidaghanon sa shabu nga ilang nasakmit.

Dugang pa ni Oriol nga si Go nalakip sa mga pamilya nga nanag-iya og mga commercial building sa Dakbayan sa Mandaue.

Samtang ang Lapu-Lapu City Police Office nilampos sab sa buy-bust operation hinungdan sa pagkasikop sa mga suspetsadong pusher sa Barangay Pajo alas 10 pasado sa niaging gabii.

Si Police Captain Felix Cleopas niila sa ilang dinakpan nga si Raymudo Ybañez Bancaire, Jr., 41, kinsa nakuhaan og 15 ka gagmay nga pakete sa shabu.

Nadakpan usab sa Sitio Buyong ang duha ka pusher nga sila si James Rhel Ochea Antone, 29, taga Proper Basak, Lungsod sa Compostela ug Nixon Paquibot Amistad, 41, construction worker kinsa nakuhaan og P11,560 nga balor sa shabu. /GMR (BANATNEWS)