Duha patay sulod sa 24-oras

CEBU, Philippines — Duha ang patay sa duha ka managlahi nga pagpamusil sa Dakbayan sa Sugbo sulod lang sa 24-oras.

Unang pagpamusil nahitabo sa may Sitio Riles, Barangay Hipodromo alas 6 pasado niadtong Martes sa gabii.

Ang nakalas naila nga si Erwin Vestil, 42, residente sa maong lugar, kinsa nakaangkon og tulo ka samad pinusilan sa iyang kamot, dughan ug likod.

Matud ni Police Staff Sergeant Roy Bacus sa Mabolo Police Station nga ilang gisubay kung ang kamatayon ni Vestil may kalabutan ba sa ilegal nga drugas human ang amahan niini nibutyag nga tigamitan kini og ilegal drugas.

Giingong nakakita og kalalis ang biktima pipila ka gutlo sa wala pa kini gipusil apan ang mga residente sa lugar tak-om sa maong hitabo.

Ikaduhang pagpamusil nahitabo alas 12:15 sa kaadlawon kagahapon sa may B. Aranas Extension, Barangay Duljo Fatima nga gikamatay ni Niño Aguilar, 39, residente sa maong lugar samtang ang mamumuno naila lang sa pangalan nga Gil.

Matud ni Police Master Sergeant Nicolo Gonzales sa Mambaling Police Station nga gisusi pa nila ang pagkatawo sa biktima.

Giingong nakit-an pa si Aguilar ug ang mamumuno nga naglakaw sa lugar ug takulahaw lang nakadungog sila og buto sa armas.

Ang pamilya sa namatay nagtuo nga love triangle ang motibo sa kamatayon ni Aguilar.

Apan ang kapolisan nagsusi sab sa posibleng kalambigitan niini sa ilegal nga drugas.

Samtang wala pa gihapon mailhi ang lalaki nga napalgang patay sa Sitio Ilang-Ilang, Barangay Lagtang, Dakbayan sa Talisay.

Si Police Major Gerard Ace Pelare, hepe sa Talisay City Police Station, nibutyag nga sa pagsuwat niining maong balita wala pay tagtungod nga nikuha sa patay’ng lawas.

Gibana-bana nga nagpangedaron og 30-anyos ang patayng lawas sa maong lalaki.

Ang patayng lawas sa biktima nakuhaan og drug paraphernalia sa dihang kini napalgan. GMR (BANAT NEWS)