Bata nilugwa sa imburnal

CEBU, Philippines — Human sa kapin sa 24-oras nga pagpangita, ang 5-anyos nga bata nga si John Clark Ebua ang nilugwa sa imburnal dala sa kusog nga bulg-og sab aha kagahapon sa hapon.

Ang patayng lawas ni John Clark nakit-an sa disaster team alas 5:54 kagahapon sa hapon sa may sapa sa Sitio Living Water sa Barangay Cogon Pardo, Dakbayan sa Sugbo, mga 1.2 kilometros gikan sa iyang natagakan nga imburnal.

Si John Clark natagak sa imburnal samtang nagduwa sa bola dihang nibunok ang uwan niadtong Sabado sa Sitio Exoville, Barangay Basak Pardo, Siyudad sa Sugbo.

Ang mga rescuers sa Cebu City Disaster Risk Reduction and Management Office (CCDRRMO), Special Rescue Unit sa Bureau of Fire Protection (BFP)-7, Base Camp ERT Volunteers ug uban pa ang nagtinabangay sa pagpangita sa bata.

Hangtud kagahapon sa ikaduhang adlaw sa search and retrieval operation, ang mga rescuers nitutok sa may sapa duol sa Tagunol diin ilang gituohan nga adto anuron ang bata.

Nigamit na sila og backhoe aron pagkuha sa mga basura nga nagtipun-og ingon man K-9 dog nga makatabang kun asa dapita ang bata.

Bugtong anak ni Julie Ann Nacion ug Ryan Ebua si John Clark. Si Julie Ann nagpasalamat sa tanang rescuers nga nitabang aron makit-an ang iyang anak gikan sa pagkalunod niini hangtud nga kini na-recover.

Ang bata gidala dayun sa St. Gabriel Funeral Homes aron sa pagpahiluna niini.

Si Konsehal Dave Tumulak, chairman sa committee on disaster risk Reduction and management sa konseho sa siyudad nga nitabang aron makit-an ang bata, niasoy nga usa kalisdanan nga ilang nasugatan sa search and retrieval operation ang kadaghan sa basura sa sapa.

Nibisita sab si Cebu City Mayor Edgardo Labella sa dapit diin giduol niini ang inahan ni John Clark aron paghupay sa kaguol nga gibati ug nipasalig sab kini nga motabang ang kagamhanan sa siyudad sa pamilya.

Nimando ang mayor nga dili undangon ang search and retrieval operation hangtud nga nakit-an ang bata nga patay na. (Rowena D. Capistrano/GMR)(BANATNEWS)