Mga school supply ug history book sa Kapitolyo gipatimbang

CEBU, Philippines – Usa ka kawani sa Kapitolyo giingong nagbuot-buot og patimbang sa mga school supplies ug history books ngadto sa usa ka junk shop sa Barangay Canduman, Dakbayan sa Mandaue niadtong Biyernes.

Si Bernard Calderon, officer-in-charge sa Provincial General Services Offices (PGSO) nibutyag nga ang maong empleyado usa ka lalaki ug na-assign sa Hope Center sa Archbishop Reyes Avenue, Dakbayan sa Sugbo.

Nikabat ngadto sa 793 ka sets sa school supplies diin matag set gilangkuban sa usa ka plastic envelope, notebook, lapis, ug pad paper nga alang sa grade 3 ug grade 4 ang gipatimbang.

Matud ni Calderon nga nikabat sa P34mil ang nagasto sa Kapitolyo sa pagpalit sa maong mga school supply niadtong Mayo 2018.

Apil usab nga gipatimbang ang 145 ka history books sa nagkadaiyang lungsod ug dakbayan sa lalawigan sa Sugbo.

Nasayran kini nila ni Calderon human sila nakadawat og tip gikan sa usa sa ilang personnel.

Nahibulong usab si Calderon nga wala mahurot ang maong mga school supply sa pag-apod-apod ngadto sa mga tinun-an sa karon nga school year.

Si Calderon nagkanayon nga ang maong empleyado nibutyag nga adunay nagsugo kaniya nga staff sa provincial school board nga ipalimpiyo ang maong supplies.

“Somebody instructed him kuno, murag ang iyang term gyud kay ipalimpyo, sa ato pa walay mahabilin”, matud ni Calderon.

Apan giingong gibakwi sa maong empleyado ang rason ug giangkon niini nga iyahang pagbuot ang pagpatimbang sa maong mga school supplies.

Sa pagkakaron padayon ang gihimong imbestigasyon lakip na niini ang pagtugot nga mapagawas ang maong mga supply gikan sa warehouse.  (/BDB)(BANAT NEWS)