Ahong nagpatabang sa mga konsehal

CEBU, Philippines — Nangayo og suporta sa konseho sa Dakbayan sa Lapu-Lapu si Mayor Junard “Ahong” Chan alang sa iyang gihan-ay nga mga programa sa kausaban sa iyang administrasyon.

Naglakip niini ang dekalidad nga health program nga gitumong alang sa mga kabus nga molupyo sa kabarangayan pinaagi sa pagpalambo sa serbisyo sa hospital.

Gitinguha sab ni Chan ang paghatag og trabaho sa mga molupyo pinaagi sa training sama sa panahi ug uban pa.

Tinguha usab niya ang paghatag og desinte ug permanente nga pinuy-anan sa mga kabus ug ang pagpatungha sa kabataan nga libre sa ug pagpalambo sa Lapu-Lapu City Community College u gang tukuron nga Olango Community College.

Matud sa mayor nga ang iyang administrasyon maningkamot usab sa pagsulbad sa mga nasinati nga pagbaha ug ang problema sa basura.

Dugang gitinguha ni Chan ang pagsumpo sa ilegal nga drugas ug ingon man ang pagpakgang sa mahitabong krimen.

Samtang sa ilegal nga drugas maoy iyang gitinguha ang pag-umol sa Lapu-Lapu City Office for Substance Abuse Prevention (LOSAP) ug ang pagpatukod og rehab center sa Isla sa Olango.

Si Konsehal Efren Herrera nga usa sa mga sakop sa mayoriya sa konseho niingon nga ang programa sa mayor nga iyang ipatuman tumong sa kaayuhan ang ilang suportahan tungod kay mao man kini ang gihatag nga kaakuhan ngadto kanila sa mga Oponganon.

Sa nasayran nga si Chan ug Bise Mayor Celedonio Sitoy kauban sa ilang duha ka mga konsehal sa PDP-Laban mao lang ang nidaug sa niaging piniliay ug napulo ang nidaug sa Lakas-CMD nga mga konsehal sa napilde nga kaatbang ni Chan nga si kanhi kongresista Arturo “Boy” Radaza. (/GMR)(BANATNEWS)