Away sa parking usa patay
CEBU, Philippines — Patay ang 40-anyos nga lalaki human gipusil sa ilang silingan tungod lang sa parking apan suspek nitahan atol sa follow-up operation sa kapolisan pipila ka oras human sa insidente sa may Sunshine Valley, Barangay Quiot, Dakbayan sa Sugbo kagahapon sa buntag.
Ang biktima mao si Vladimir Alatraca alyas Pilox, minyo ug residente sa maong lugar, samtang ang suspek mao si Jersam Armecin, minyo ug usa ka car shop supervisor nga silingan sa biktima.
Base sa pamahayag sa mga saksi nga ang biktima sakay sa iyang motor nga nagsunod sa gimaneho nga sakyanan sa suspek nga usa ka itom nga Ford pick-up.
Ang sakyanan nga gimaneho sa suspek giingong niatras ug tuyo nga gibanggaan ang biktima hinungdan sa kasuko niini ug nihagit nga magsinukmagay sila.
Apan imbis mosukol ang suspek kalit kining nibunot sa iyang armas dayon pusil sa biktima sulod sa tulo ka higayon nga maoy naingnan sa hinanali niini nga kamatayon gumikan sa tulo ka samad pinusilan sa iyang lawas ug nawong.
Ang duha giingong dunay mainiton nga lalis sa nilabay nga adlaw tungod lang sa parking ug gikatakda unta silang atubangon sa barangay alas 10 sa buntag kagahapon aron husayon.
Matud pa nga ang luna nga naa sa tugkaran sa biktima ang parkinganan sab sa suspek sanglit giingong agianan kini ug walay nanag-iya.
Ang suspek nitahan atol sa hot pursuit operation sa kapolisan sa trabahoan niini sa may Kamagong Street, Barangay Lahug. (Rose Carmel De la Cerna, CNU Intern/GMR) (BANAT NEWS)
- Latest