Duha ka babaye gipatay
CEBU, Philippines – Tulo ang patay lakip ang duha ka mga babaye sa duha ka managlahing pagpamusil nga nahitabo sa Tabunok sa Dakbayan sa Talisay kagahapon sa buntag ug sa Dakbayan sa Lapu-Lapu sa miaging gabii.
Sa Talisay City, patay diha-diha dayon sila si Cris Quiñones, 29, ug si Joy Cancancio, samtang nasamdan ang usa ka Jonema Cortes dihang sila gipamusil diha sa Sitio Mananga 1, Barangay Tabunok kagahapon sa alas 6 sa buntag. Matud pa ni Police Master Sergeant Glenn Besande sa Talisay City Police Station nag-inum ang mga biktima kuyog sa duha ka mga lalaki dihang sila giduol sa wala mailhing mga mamumuno ug gipamusil.
Patay ang duha ka mga babaye samtang si Cortes nadala sa tambalanan.
Nakita nga nagsul-ob og mga itom nga jacket ang duha ka lalaking nisibat human sa pagpamusil.
Duha ka basiyo sa gituohang .45 nga bala ang nakuha sa crime scene sa mga sakop sa Scene of the Crime Operatives (SOCO). Ang kapolisan nikonsiderar sa mga kainom sa duha nga mga persons of interest ilabi na si Cortes nga matud pa nagusab-usab ang pamahayag.
Ang mga kabanay ni Quiñones ang nangapriso na gumikan sa pagkalambigit sa ginadiling drugas.
Samtang didto sa Sitio Cemento, Barangay Pusok sa Dakbayan sa Lapu-Lapu nakalas ang usa ka Jose Antonio Jr., 45, nagpuyo sa maong dapit, samtang wa mailhi ang mga mamumuno nga nagmotor.
Ang biktima nag-inum duol sa iyang balay, sa dihang kalit nga gipusil sa wala mailhing mamumuno sulod sa makadaghan nga higayon nga maoy naingnan sa hinanali nga kamatayon niini. Sa pagkakaron blangko pa ang kapulisan sa dakbayan sa motibo sa maong krimen ug padayon pa nga gihimo ang imbestigasyon. (Rowena Capistrano/IBM)(BANAT NEWS)
- Latest
