Kanhi aide ug drayber ni Sabalones sikop
CEBU, Philippines – Giingong kanhi aide ug personal driver ni Franz Sabalones ang nadakpan diha sa iyang panimalay sa Sitio Nonoc, Barangay Tabunok, Dakbayan sa Talisay kagahapon sa buntag.
Ang mga sakop sa Provincial Intelligence Branch (PIB) sa Cebu Provincial Police Office (CPPO) nagbitbit sa search warrant nga giluwatan ni Regional Trial Court (RTC) Judge Leopoldo Cañete sa Branch 60 sa Lungsod sa Barili batok kang Gonzalo Abellana, II alyas “Jeto”, 36-anyos, nagpuyo sa maong lugar ug giingong ang amahan niini kanhi kagawad sa Tabunok.
Si Police Captain Alejandro Batobalonos, pangulo sa PIB nagkanayon nga tulo ka semana nilang gipanid-an si Abellana hangtud nga ilaha gyud kining naabtan.
Giingong ang mga ginikanan sa suspetsado niangkon sa kapolisan nga ang ilang anak nagtrabaho kang Sabalones og ilaha kining gibadlong.
Si Abellana nasakmitan og airsoft pistol nga dunay magazine ug usa ka bala, duha ka dagkong pakete ug 15 ka medium nga paketeng drugas nga nitimbang ngadto sa 275 gramos ug nibalor ngadto sa P1.8 milyon ug timbangan nga giingong gamiton sa pag-repack og shabu.
Si Abellana nagkanayon nga diha siya sa resort ni Sabalones nagtrabaho ug maghatdanan usab sa iyang amo kong aduna kini lakaw.
“Molakaw ni siya gabii unya mauli sa kadlawon na. Mao ni ang mabantayan gyud sa iyang ilegal nga kalihukan”, matud ni Batobalonos.
Samtang si Police Captain Nazareno Emia sa CPPO nagkanayon nga gawas sa pagkadrayber ni Abellana, kanhi kolektor kini sa halin sa drogas ni Sabalones.
Matud ni Emia nga kini ang usa ka timailhang aktibo pa gihapon ang mga gaway ni Sabalones. (Camille L. Pateres/BDB)(BANAT NEWS)
- Latest
