Kasapaan limpyohan, kabarangayan giawhag

CEBU, Philippines — Giawhag sa pangulo sa City Planning and Development Council (CPDC) ang tanang kabarangayan sa Siyudad sa Talisay nga manglimpyo sa kasapaan ug kadagatan.

Si Engr. Christine Homez, pangulo sa CPDC nagkanayon nga sugdan nila sa paglimpyo ang sapa sa Barangay Bulacao diin nakit-an sa taga Environmental Management Bureau (EMB) nga kontaminado na ang maong sapa.

Naobserbahan nga walay spetic tank ang matag panimay sa dapit diin deretso ang ilang hugaw sa sapa samtang ang uban pataka lang og labay sa ilang mga basura.

Nalakip ang Brgy. Bulacao sa 11 ka lugar nga hugaw na ang sapa.

Asoy pa ni Homez nga sunod semana sila manglimpyo sa sapa sa Bulacao samtang ang uban isunod nila.

Ilang buhaton mao ang pagrehab sa maong sapa kay kon pasagdan mamatay na gyud kini nga sapa ug posibleng makadaut pa sa katawhan.

Gawas sa hugaw, usa sa ilang tutokan mao ang mga nakababag sa sapa ilabi na ang mga panimay. (/DILT)(BANATNEWS)