Kaluwasan sa kabataan giampo
CEBU, Philippines — Gipanawagan sa pangulo sa Department of Education (DepEd) Talisay City Division nga unta ang mga kabataan o ang mga tinun-an sa Siyudad sa Talisay maglikay sa paggamit og mga pabuto o mga butang nga makadaut kanila samtang mosugat sa Bag-ong Tuig.
Si Dr. Leah Noveras ang schools division superintendent sa DepEd Talisay City nagkanayon nga iyang gilakip sa iyang pag-ampo ang mga kabataan nga malamdagan o magiyahan sa ilang mga ginikanan panahon sa bakasyon, kini aron malikay sa dili maayong hitabo.
“Ang akong mga pag-ampo alang sa tanang kabataan nga among pinangga nga malikay sila sa tanang peligro, disgrasya, katalagman, aksidente ug sa mga tawo nga nagtinguha o magtinguha’g dautan kanila,” matud pa ni Noveras.
Lakip nga giampo niini mao ang iyang mga magtutudlo.
Siya nagkanayon nga unta bisan paman sa kalisud kanunay sab nila nga makit-an ang paglaum. Kun aduna may mga deperensya nga nahitabo, unta kini makalimtan aron makasugod og bag-o sa sunod tuig.
Nasayran nga ang mga pampublikong tunghaan mobalik sa ilang klase karon nang Enero 3 tuig 2019. (BANAT NEWS)
- Latest
