Nasunugan giduaw nilang Labella, Bong Go
CEBU, Philippines — Gibisita kagahapon sa buntag ni Cebu City Vice Mayor Edgardo Labella ang mga nasunugan sa Barangay Duljo-Fatima.
Gideklara na ubos sa ‘State of Calamity’ ang maong barangay hinungdan nga makapagawas na ang kagamhanan og calamity assistance diin base sa balaud makadawat og P10 mil ang matag pamilya.
Dugang ni Labella nga anaa ra kini sa mayor kun dugangan ba niini ang maong hinabang o dili.
Gibutyag sab sa bise mayor nga mihatag og hinabang ang Office of the President pagkahuman sa sunog. Aduna sab mga NGO’s sama sa Sacred Heart Association Batch 85 nga mihatag og ubay-ubay nga hinabang sama sa pagkaon.
Naghinaut si Labella nga adunay himoong reblocking sa lugar apan magpaabot usa sila sa desisyon sa mayor.
Nasayran nga ang ubang luna nga nasunog, gipanag-iya og pribadong tawo ug gikataho nga dili na pabalikon ang mga biktima.
Nanghinaut siya nga dili unta pasagdan ang mga biktima ilabi na karong panahon sa Pasko ug nagsingabot ang Bag-ong Tuig.
“… isalikway usa ang mga pamolitika. Let us work together. Let’s join hands in helping this poor victims” hangyo sa bise mayor.
kagahapong adlawa, miduaw si kanhi Special Assistant to the President Christopher Lawrence “Bong” Go sa mga nasunogan.
Gidala niya ang hinabang gikan ni Pres. Duterte alang sa mga biktima sa maong sunog.
Ug tungod kay sugaton man unya ang Bag-ong Tuig, si Go maoy mobangka sa salu-salo sa mga nasunogan nga nagpasilong diha sa covered court sa Duljo-Fatima. Nichole Alexis A. Abas (BANAT NEWS)
- Latest
