Dagkung politiko sa Mandaue naghiusa

CEBU, Philippines — Pormal na nga gipahibalo ang panag-alyansa sa tulo ka inilang politiko sa Dakbayan sa Mandaue.

Kini gilangkuban nilang Kongresista Jonas Cortes, kanhi konsehal Emmarie “Lolypop” Ouano-Dizon ug kanhi kongresista Nerrissa Soon-Ruiz.

Si Cortes sa iyang pamahayag niingon nga ang iyang pundok nga ubos sa Kaabag ug ang pundok nga Ang Anak sa Mandaue ni Lolypop uban ni Soon-Ruiz ang nagkahiusa sa usa lang ka tumong nga pagpadayon sa kalambuan sa dakbayan nga nasugdan na sa ilang katigulangan.

Si Cortes anak ni anhing Demetrio Cortes Sr. samtang si Lolypop anak ni anhing Thadeo Ouano kinsa anak sab ni anhing Alfredo Ouano nga pulos nag-agi sa pagka-mayor sa dakbayan ug si Soon-Ruiz anak sab ni kanhi mayor Restituto Soon.

Gitataw ni Cortes nga dili lisud ang ilang paghiusa bisan kun sa nangagi nga piniliay nagkaatbang sila tungod kay gawas nga sila lumad nga Mandauehanon, ang ilang ginikanan daan na nga nagkauban kaniadto sa pagpangatungdanan.

Gipasabot ni Cortes ang kamahinungdanon sa ilang panag-alyansa nga ang tumong mao  lang ang pagpadangat sa mga gikinahanglan nga proyekto.

Si Cortes mobalik sa pagka-mayor, si Lolypop ang mag-kongresista samtang si Soon-Ruiz ang magpapili sa pagka-konsehal. – GMR (BANAT NEWS)