Kalinaw giampo atol sa pagsaulog sa Eid’l Adha

CEBU, Philippines — Ang kalinaw sa nasud ug tibuok kalibutan maoy giampo sa mga sakop sa Muslim Community atol sa ilang pagsaulog sa Eid’l Adha kagahapon sa buntag.

Si Abdul Samad kinsa usa sa mga nagdumala sa Cebu Green Mosque diha sa Barangay Zapatera, Dakbayan sa Sugbo nagkanayon nga aduna silay daghang mga kalihukan sayo sa buntag nga gisugdan sa pag-ampo ug duha ka wali nga nagsentro sa pagbaton sa kalinaw sa nasud ug mahunong na ang kagubot ilabi na ang insidente sa pagpamatay nga hangtud karon wala pa masulbad.

Matud ni Samad nga kong magpadayon ang kalinaw walay angay ikahadlok ang katawhan bisan og maglakawlakaw diha sa kadalanan.

Human sa pag-ampo naghiusa sa pagpangaon ang sakop sa Muslim Community sa mga pagkaon nga giandam alang sa maong kasaulogan.

Nunot niini, malinawon ang pagsaulog sa Eid’l Adha sa Sugbo kagahapon matud sa hepe sa operations branch sa Cebu City Police Office nga si Police Chief Inspector Wilbert Parilla.

Kagahapon gisentro sa kapolisan ang pagbantay sa hotel sa Dakbayan sa Sugbo diin ipahigayon ang conference nga gitambongan ni Presidente Rodrigo Duterte.

Gibutyag ni Parilla nga kapin sa 200 ka polis ang gipakatap diha sa hotel diin magtagbo ang mga mayor sa Kabisay-an kang Duterte.

Ang kapolisan walay nadawat nga mga report kabahin sa mga insidente atol sa nahisgutang  kasaulogan.

Gawas diha sa Cebu Green Mosque dunay mga tigom usab sa Muslim Community diha sa Al-Khairiah Mosque ug sa Plaza Independencia.

Dugang niya nga nidonar ang Police Regional Office (PRO)-7 og duha ka baka ug lima ka kanding alang sa Muslim Community aron magamit sa ilang selebrasyon. (Camille L. Pateres/BDB)(BANATNEWS)