‘No ID No Entry’ sa Mandaue CH

CEBU, Philippines — Mas gipahugtan karon sa kagamhanan sa Dakbayan sa Mandaue ang seguridad sa City Hall nunot sa sunod-sunod nga pagpamatay sa mga opisyal sa gobiyerno.

Higpit karon nga gipatuman ang “No ID No Entry Policy” subay sa  memorandum nga giluwatan ni City Administrator, Atty. Danilo Almendras.

Iyang giawhag ang tanang departamento sa paghimo og ilang mga pamaagi sa paghatag og kasegurohan sa mga kawani sa kagamhanan.

“It is imperative that each department or office shall review its security plan and adopt measures to strengthen security protocols,” matud sa memorandum ni Almendras.

Nunot niini iyang giawhag ang mga kawani ug pangulo sa maong mga buhatan sa pag-review sa ilang kahimtang ingon man ang paghatag og kasegurohan sa mga kawani nga mabantayan ang bisan unsa nga mga hulga. Dugang ni Almendras nga malikayan unta nga makasulod ang mga armado nga mga tawo ug himoon ang pagtinabangay sa pagtan-aw sa mosulod sa ilang buhatan nga kinahanglan gyud nga masusi ang kahimtang o pagkatawo niini.

“All Janitorial and Security Services Unit and other security personnel shall implement the ‘No ID, No Entry Policy,” nagkanayon ang memorandum ni Almendras. (BANAT NEWS)