Bata nga amang naligsan og trak, napigsat
CEBU, Philippines — Nalata ang lawas sa 7-anyos nga batang-lalaki dihang naligsan sa trak de karga nga iyang gikapyotan didto sa Serging Osmeña Street sa Barangay Tejero kagahapon sa buntag.
Ang biktima nga si Julius Benites, usa ka amang, ilo na sa ginikanan ug nagpuyo na lang uban sa iyang ig-agaw sa Barangay San Roque, Dakbayan sa Sugbo.
Si SPO1 Edgardo Baton miingon nga samtang stop ang signal, ang bata mikompayot sa kilid sa sakyanan (GKV 405) apan pagdagan natapigas ug nalatayan gyud sa ligid.
Ang drayber nga si Hubertson Beto, taga Barangay Guadalupe, gitanggong karon sa kapolisan, apan mahimong buhian ra kon ang kabanayan sa bata dili moreklamo.
Ang hepe sa Waterfront Police Station nga si Senior Inspector Joemar Pomarejos miingon nga ang tag-iya sa trak motabang sa pagpalubong sa bata ug mohatag og tabang salapi sa iyang kabanayan. (BANAT NEWS)
- Latest