Gikan sa hearing sa korte
CEBU, Philippines – Patay ang usa ka lalaki nga gikan pa nga mitambong og hearing sa korte sa kaso sa ilegal nga drugas dihang kalit lang gipusil sa riding-in- tandem sa sulod sa multicab nga pasaheroan sa Barangay Pusok, Dakbayan sa Lapu-Lapu alas 9 pasado ang takna kagahapon sa Biyernes sa buntag.
Si Police Officer 3 Marvin Saraum sa Homicide Section sa Lapu-Lapu City Police Office (LLCPO) miila sa biktima nga mao si Fidel Daitol Ybañez, 27, taga Barangay Buaya sa maong dakbayan.
Ang drayber sa pasaheroan miingon nga nanglayat sa kalisang ang iyang mga pasahero dihang gipusil ang usa sa iyang mga sakay nga nisakay gikan sa atubangan sa City Hall.
Gituohan nga nagsunod nang daan diha sa may city hall ang mga mamumuno ug pag-abot sa nahitaboan gibirahan kini. Ang biktima dali nga gidala sa Lapu-Lapu City Hospital apan gideklarar nga dead on arrival. Wa pa matino sa kapolisan kon kinsa ang mga mamumuno ug motibo sa pagpatay sa biktima. (/IBM)(BANAT NEWS)
- Latest
