Nagpalusot og gasolina gidakop

CEBU, Philippines – Gitanggong sa detention cell sa Bantayan Police Station ang pito ka tawo nga gikatahapang nagpayuhot og 56 ka container nga gasolina nga gikarga sa pumpboat nga gidunggo sa Talangnan, Lungsod sa Madridejos.

Si Police Chief Inspector Florendo Laude Fajardo, hepe sa Bantayan Police Station, maoy nangulo sa pagdakop sa pito ka suspek nga giila nga sila si Rodel Santillan Caratao, 33; Victor Pinote Moreno, 36; Junjun Silverio Ducanes, 30; Reynante Sedurifa Chapin, 28; John Kim Burgos, 25, pulos taga Barangay Poblacion ug Ronnie Gapasin Illustrisimo, 47 ug Domingo Burasca Forosuelo, 29, taga Barangay Pili, Madridejos.

Si Fajardo nakadawat og mga taho labot sa nagpadayon nga pagpalusot og ilegal nga gasolina nga gisulod og mga container nga maoy nakaaghat kanila sa pagpahigayon og pakisusi.

Matud ni Fajardo nga una nilang gipangayo sa mga dinakpan ang permit sa gikarga nilang gasolina ug napakyas sila pagpakita niini ingon man walay Environmental Compliance Certificate (ECC) hinungdan nga ilang gidakop. Ang mga dinakpan mag-atubang og kaso nga kalapasan sa Presidential Decree 1865 o ang ilegal nga pagtimbol ug pagbaligya og gasolina. (/GMR)(BANAT NEWS)