Ang provincial police director sa Sugbo ug Negros gi-relieve

CEBU, Philippines – Ang mga provincial director sa kapolisan sa Sugbo ug Negros Oriental girelibohan sa ilang katungdanan ug gimandoan nga mo-report dayon didto sa PNP National Headquarters sa Camp Crame.

Si Cebu provincial director Edgar Alan Okubo hulipan ni Senior Supt. Manuel Javier Abrugena, samtang si Senior Supt. Raul Tacaca maoy mopuli sa pwesto nga biyaan ni Negros Oriental police director Edwin Portento.

Matud ni Police Regional Director Robert Quenery nga ang oversight committee sa Camp Crame maoy misugyot nga magpahigayon og major revamp sa kapolisan nga apektado ang mga tag-as nga opisyal.

Gipasalig ni Quenery nga ang pagrelibo nila ni Okubo ug Portento dili makaapekto sa seguridad sa umaabot nga Barangay ug Sangguniang Kabataan elections karong Lunes. Matud ni Quenery nga ang revamp sa mga tag-as nga opisyal gipatuman usab sa ubang rehiyon kay kini maoy kamandoan sa bag-ong hepe sa PNP nga si General Director Oscar Albayalde.

Apan si Gobernador Hilario Davide III nakalitan sa pagkarelibo ni Okubo nga wala siya masayod.

"I'm caught by surprise by this kay hapit na gud ang election, and I think they made preparations already," matud ni Davide. Ang balaod naglatid nga ang gobernador maoy hatagan og katungod pagpili og provincial police director, apan dili na kinahanglang mananghid kaniya ang Camp Crame kon hulipan ang opisyal.

Naglaum lang si Davide nga dili unta maapektohan ang security preparations karon nga wala na si Okubo sa Sugbo.

"Para nako he's been doing very well, we have good relationship ang police and the province," sumala sa gobernador. (Camille Pateres/RUB)(BANAT NEWS)