Kandidato kinahanglang may resume

CEBU, Philippines — Suportado sa mga opisyal sa Kapitolyo lakip na sa Commission on Elections (Comelec) sa Probinsya sa Sugbo ang awhag sa National Citizens Movement for Free Elections (Namfrel) nga kinahanglan adunay resumes nga isumiter ang mga kandidadto sa umaabot nga Barangay ug Sangguniang Kabataan (SK) election karong Mayo.

Si Bise Gobernador Agnes Magpale nagkanayon nga maayo ang ideya sa Namfrel, apan ang problema angay lang kini alang sa mga kandidato sa SK apan dili mamahimong applicable sa mga kandidato sa barangay.

“Naay natural leaders nga not necessarily nga that educated, academically prepared, but duna siya’y leadership. Para nako sa barangay dili na kaayo applicable,” matud sa bise gobernador.

Ang Namfrel niapelar ngadto sa Comelec pagpagawas og resolution pag-require sa mga kandidadto sa barangay ug SK election nga mosumiter sa ilang resume nga nagsaysay sa ilang skills ug kapasidad sa pagdagan sa partikular nga posisyon.

Ang maong tinguha gisuportahan sa Department of Interior and Local Government (DILG).

Si Atty. Lionel Marco Castillano ang provincial election supervisor nagkanayon nga walay balaod nga nagdili pag-attach og resume sa certificate of candidacy (COC) sa mga kandidato.

Samtang uyon siya niini, mas gusto ni Castillano nga klarong plataporma gyud ang gikinahanglan.

 “Para nako, ayaw ang resume, the platform og government na lang kay kung resume nimo, naa na man na sa iyang COC, ang imong experience pwede nimo isulod sa imong platform of government.  It could be best,” matud ni Castillano.

Sa pikas bahin, wala gisalikway ni Kapitan Raul Cabañero, presidente sa Association of Barangay Council (ABC) sa Siyudad sa Talisay nga magpapili siya pagkakonsehal sa Siyudad sa sunod tuig nga piniliay.

Kataposan nga termino pagka kapitan sa Barangay Bulacao ni Cabañero ug siya miingon nga iya unang gitimbang-timbang kon kayahon ba ilabi na sa pundo.

Nagtinguha sab siya nga kon naa na man gani siya’y resources aron sa pagpadagan sa iyang pagpangampanya hayan gusto unta siya nga anaa gihapon sa linya ni Mayor Eduardo Gullas.

Sa konseho sa pagkakaron hayan motapos na ang termino ni Valeriano Ylanan ug si Richard Francis Aznar. — Gabriel Bonjoc (BANATNEWS)