ASEAN security plan himoon sa Sinulog 2018

CEBU, Philippines — Dako ang matabang sa paggamit sa security plan atol sa Association of Southeast Asian Nation (ASEAN) Summit alang sa pagpahugot sa seguridad sa Sinulog 2018 sigon pa ni Cebu City Police Office Deputy City Director for Administration, PSupt. Artemio Ricabo.

Nasayran nga una nang nibutyag ang hepe sa Operations branch sa CCPO nga si PSupt. David Señor nga ang security plan nga gigamit niadtong ASEAN nga gipahigayon sa Bohol ug ang ika-51 nga International Eucharistic Congress nga gipahigayon sa Dakbayan sa Sugbo niadtong 2016, mao ang sundon nga plano alang sa seguridad inig sugod sa nobenaryo sa Basilica Minore del Santo Niño hangtud na sa Fiesta Señor ug uban pang kalihukan sa Sinulog 2018. Kini human namatikdan nga nagmalampuson ang duha ka mga dagkong nasudnong kalihokan dinhi sa rehiyon siete.

Si Ricabo mitataw nga kini nadesisyonan ni PRO-7 Director PCSupt. Jose Mario Espino aron adunay koordinasyon sa tanan gikan sa Dakbayan sa Lapu-Lapu ug Mandaue.

Matod pa nga gawas sa anti-criminality forces, aduna say airport security, route security sa duha ka mga dakbayan gawas sa Siyudad sa Sugbo.

Wala pa say desisyon kon ipa-shutdown ba ang mga cellular signal panahon sa Sinulog Grand Parade kay sa pagkakaron, wala pay nasigpatang hulga ang Regional Intelligence Division.

Apan usa lang ang sigurado matod pa ni Ricabo, ug kini mao ang gun ban sa tibuok Dakbayan sa Sugbo sama sa niaging tuig.

Samtang han-ay na ang gihimong pagpangandam sa kagamhanan sa Siyudad sa Sugbo alang sa pagbukas sa umaabot nga kapistahan sa Balaang Bata ug sa Grand Parade.

Matud ni Konsehal Dave Tumulak, ang Executive Committee Chairman sa Sinulog 2018 nga kagahapon, nagtigum ang mga pangulo sa nagkalain-laing departamento sa Cebu City hall aron sa paghingpit sa preparasyon.

Gipangandaman nila ang opening salvo karong Enero 11 nga mao ang unang adlaw sa nobenaryo.

Gitrabaho na nila ang paghapsay sa kadalanan, pagtapak sa mga libaong, pag-ayo sa street lights, drainage, pag-andam sa billeting school ingon man ang traffic rerouting.

Gipahibawo sab ni Tumulak nga ang Department of Public Works and Highways, niuyon sa hangyo nila nga ablihan ang south bound lane sa Natalio Bacalso Avenue ug F. Llamas Street kon diin gitrabaho ang underpass, kini aron sa pagpaluag sa trapiko sa may Bayabas ug Dapdap. Gipasalig sa konsehal nga dili kini makalangay sa trabaho ang pagbukas sa maong lane nga mahitabo sa dili pa ang Enero 11.

Subay sa kalihukan sa Sinulog, usa sa problema nga nakit-an mao ang kahuot sa dagan sa trapiko ug sigon sa Operations Head sa Cebu City Transportation Office, Francisco “Isko” Ouano, nga ilang ipahibawo sa katawhan nga gikan sa Enero 11 hangtod 21, makasinati gyud og kahuot sa dagan sa trapiko.

Dunay mga dalan sa Basilica nga sirad-an ug mopagawas og notisya ang CCTO mahitungod niini. (BANAT NEWS)