Imbes P50 mil abogado na lang

CEBU, Philippines — Imbes P50 mil nga legal aid mas gusto sa kapolisan nga abogado na lang ang itanyag ni Cebu City Mayor Tomas Osmeña kon makapatay og kriminal ang mga polis.

 "Pasalamat ‘ta in fact acceptance fee ra na siya. Mas nindot gani kung abogado na lang ang ihatag ba kay the long run, mohulbot gihapon ang polis kay dugay baya na mahuman ang kaso," matud pa ni Cebu City Police Office Deputy City Director for Administration Police Supt. Artemio Ricabo.

 Nasayran nga human sa mando ni Presidente Rodrigo Duterte nga ibalik na ang kapolisan sa pagpakigbatok sa druga mipadayag si Osmeña nga motanyag og kwarta ngadto sa polis kinsa makapatay og kriminal atol sa operasyon ilabi na kon nalambigit kini og droga.

Niadtong miaging tuig, nanghatag og P50 mil nga ganti ang maong mayor ngadto sa kapolisan nga makapatay og drug personality sa dakbayan aron makadepensa kon may mopasaka kanila og kaso tungod sa ilang napatay.

Apan nahunong kadto kay naapil sa gipangrelibohan ang iyang mga sinaligang tawo sa nahitabong major revamp sa kapolisan.

 “Di gihapon ta mo-encourage sa atong men na mopatay gyud. We have to preserve life and the human rights,” dugang pa sa maong opisyal.

Sa laing bahin, pipila ka mga konsehal sa oposisyon  sama ni Konsehal Raymond Garcia miingon nga kon ang intensiyon sa mayor mao ang pagtabang sa kapulisan mas maayo pang moumol kini og special team sa mga abogado nga maoy molaban sa mga polis.

Matud ni Garcia ang P50 mil dili paigo pangbayad sa serbisyo sa abogado kon criminal case ang atubangon sa polis.

Apan lahi og panglantaw ang kauban niining konsehal nga si Joel Garganera kinsa chairman sa Police Advisory Council sa siyudad. Matud niya ‘welcome gesture’ ang plano sa mayor apan mas maayong wala’y kondisyon nga kinahanglan mamatay ang kriminal ayha pa tabangan og P50 mil ang polis.

Nagplano si Garcia nga moduso og resolusyon sa konseho nga mag-awhag sa Office of the Mayor nga moumol og legal team inay mohatag sa maong kantidad. (BANAT NEWS)