Gullas: Santillana nagpamayor-mayor

CEBU, Philippines - Napungot si Talisay City Mayor Eduardo Gullas ngadto sa pangulo sa City Disaster Risk Reduction and Management Office nga si Alvin Santillana tungod sa iyang pamahayag nga posibleng dili makalahos sa Dakbayan sa Talisay ang rota sa Iron Man karong tuiga.

Si Gullas miingon nga walay katungod si Santillana nga mobuhi og pamahayag ubos sa iyang posisyon.

“That’s a crazy. Kana gibuhat ni Santillana pagbuot na niya nagpamayor-mayor na siya…Who is he?,” matud pa ni Gullas.

Sa nasayran si Santillana nipasabot nga posibleng dili makalahos ang Iron Man sa Talisay tungod kay aduna pa kini saad niadtong tuig 2015 nga wala matuman.

Siya miingon nga ang organizer nisaad sa tunghaan sa Manipis nga mohatag og P300 mil isip financial assistance apan hangtud karon walay bisan piso nga naabot.

Matud pa ni Santillana nga moduso siya og rekomendasyon ngadto sa mayor kalabot sa maong isyu. Apan kining tanan magdepende g’yud sa mayor kun unsa ang iyang baruganan sa maong isyu.

Samtang si Gullas nagkanayon nga bisan pa og walay donasyon sila nga nadawat iya gihapong tugotan ang kompetisyon nga maabot sa iyang dakbayan tungod kay dili siya maoy tag-iya sa karsada ingon man sportsman siya nga pagkatawo.

Sa pagkakaron, dili siya ganahan nga makakita o makig-estorya ni Santillana tungod kay naa pa siya sa kasuko. Siya nagkanayon nga iya ra unya kining ipatawag kun kalma na siya.

Dugang pa niya nga ilang tawgon ang organizers sa Iron Man aron ipasabot ang maong nigawas nga balita.

Samtang ang kapulisan sa Dakbayan sa Sugbo andam na sa maong prestihiyosong kompetisyon karong Agosto 6 sumala pa ni Supt. Emelie Santos, Deputy City Director for Operation nga nahinabi sa Banat News.

Matud pa ni Santos, 330 ka mga sakop sa kapulisan ang ilang ipakatap atol sa maong kalihukan.

Sumala pa ni Santos, aduna silay reserba nga crowd control tungod kay mas daghan man mga artista karon ang gipaabot nga moapil sa maong kalihukan.

Dugang pa ni Santos, base sa initial nilang kasayuran nga nakuha aduna nay 2,752 ka mga partisipante ang nalista diin 2,039 niini gikan sa Pilipinas.

Si Senior Supt. Joel Doria,CCPO director nitug-an nga makig-coordinate sila sa mga organizers alang sa kalampusan niini. (BANAT NEWS)