Retiradong bombero gipusil patay
CEBU, Philippines - Patay ang usa ka retiradong bombero ug ang kapuyo niini human sila gipamusil sa makadaghang higayon dihang paingon silang mopauli sa ilang pinuy-anan sa Barangay Subayon sa Dakbayan sa Toledo.
Giila ang nakalas mao si kanhi Senior Fire Officer 2 Isabelo Gamboa Diaz, 62, retirado nga bombero ug ang kapuyo niini nga si Iris Jane Acedera Manlangit, 25, pulos nagpuyo sa maong barangay.
Base sa imbestigasyon sa kapulisan ang mga biktima sakay sa motorsiklo nga gimaneho ni Diaz ug pag-abot diha sa Sitio Nangka sa Barangay Cabitoonan kalit lang silang gipamusil sa wala mailhing mga mamumuno.
Nalamba ang gisakyang motor sa mga biktima ug giingong didto giduol pa kini sa mamumuno ug gidul-itan silang duha pagtiwas. Dali nga nisibat ang wala pa mailhing mga mamumuno.
Gisuwayan pagdala ang mga biktima sa Toledo City Hospital apan gideklarar nga patay na.
Narekober sa lugar nahitaboan sa krimen ang pito ka kabhang sa 45 nga kalibre sa armas, tulo ka kabhang sa .9mm. Nakuha usab ang mga gamit sa biktima nga adunay salapi ug mga importanteng ID.
Padayon pa ang kapolisan sa ilang imbestigasyon sa pag-ila ug pagkasikop sa mga mamumuno lakip na ang motibo nganong gibanhigan ang duha. (BANAT NEWS)
- Latest
