Naaburido, pamilya gipatay

CEBU, Philippines - Patay ang usa ka banay human nakadesider ang ilang padre de pamilya pagpatay kanila ug pagkahuman nagpakamatay  usab sulod sa ilang panimalay diha sa Barangay Valladolid, Dakbayan sa Carcar kagahapon sa kaadlawon. Base sa imbestigasyon sa kapolisan, gituohan nilang gipamusil silang Jelyn Lopez, 36, anak nga silang Angel Mae Lapiña, 12, ug Myrr Lopez, 8, sa ilang padre de pamilya nga si kanhi Police Officer 2 Joel Lopez, 36, nga na-dismiss sa serbisyo niadtong tuig 2013.

Matud pa ni Senior Police Officer 2 Irving Avila, ang imbestigador sa maong kaso usa ka Eddie Dela Calzada ang daling miadto sa balay sa banay nga Lopez human nakadungog og buto.

Sumala pa ni Avila problemang pinansiyal ang usa sa mga hinungdan sa pagpatay ni Lopez sa iyang pamilya, apan ila pa kining palawman ang imbestigasyon tungod sa report nga nangawas nga nakagamit og kwarta ang asawa niini sa iyang trabahoan. Si Avila kinsa nakaila ni Lopez ug dili siya makatuo nga mahimo niini ang krimen ngadto sa pamilya tungod kay kini  hilumon ug buotan ug maayo sa panerbisyo sa pagkapolis. Gitug-an ni Avila, nipatim-aw pa si Lopez sa Police Station niadtong nilabay nga adlaw tungod kay nagkuha kini og Police Clearance sa tinguha niini nga molukat og passport.

Si Lopez nasulod niadtong tuig 2007, nadestino sa Public Safety Battalion ug gipadala sa Jolo, Sulu dayon nadestino sa Regional Intelligence Division dayon ngadto sa Lapu-Lapu City Police Office  ug nabalhin sa Talisay City Police Station nga maoy iyang katapusan nga assignment.

Nataktak sa serbisyo si Lopez niadtong Septiyembre 2, 2013 tungod sa kapakyas niya pagtambong sa mga court duties (hearing sa mga kaso sa ilegal nga drugas nga iyang gikuptan).

Matud pang Avila miapelar si Lopez apan gi-dismiss sa Court of Appeals niadtong Disyembre 9, 2013.

Ang kauban kanhi ni Lopez nga si Police Officer 3 Rosendo Binondo, nihulagway ni Lopez nga buotan ug dili makighugoy-hugoy kanila tungod sa kahilomon maong nasubo sila ilabi na nga giapil niini ang iyang pamilya.

Si Francisco Belamida, ang apohan sa nangamatay nitug-an nakadungog siya og buto-buto dili layo sa ilang balay hinungdan iyang gisusi ug mao nalay iyang nalilian sa bintana ang nanagbuy-od niyang mga apo. Gitug-an ni Belamida, buotan ang iyang apo ug wala gayud siya nakadungog nga nag-away o naglalis ang magtiayon.

Dugang pa ni Belamida, sa dihang na dismiss ang iyang apo usa ka tuig kining wala mouli o mopatim-aw sa ilang panimalay ug wala gayu’y nasayod kung asa kini gikan.

Gitug-an ni Belamida, wala’y bisyo ang iyang apo ug wala lang gayud kini mopatim-aw sa iyang kaso kay mura og kini maoy giduot sa iyang mga labaw base sa pagtuo niini sa dihang gipasakaan sila og kaso sa ilang dinakpan.

Si Belamida nitug-an ang iyang apo maoy maglihok sa ilang panimalay ug maoy mohatod sa iyang mga anak sa eskwelahan ug sa iyang asawa sa trabahoan. Ang tigpamaba sa Archdiocese of Cebu Msgr. Joseph Tan, nipadangat una sa iyang pahasubo sa pamilya sa namatay ug niawhag nga iampo ang kapahulayan nga dayon alang sa kalag sa mga biktima.

Samtang si Dr. Rene Obra, ang pangulo sa Center for Behavioral Science sa Vicente Sotto Memorial Medical Center mihulagway sa crime of passion ang nahitabo tungod sa ka desperado na sa hingtungdan. (BANAT NEWS)