Carillo: Ayaw sa hukmi si Boniel

CEBU, Philippines - Gihangyo sa kampo ni Bohol Provincial Board Member Niño Rey Boniel nga dili unta hukman sa publiko nga guilty ug huwaton unta ang hukom sa husgado karon nga andam na ang ilang kampo nga masang-at na sa korte ang kaso.

Ang maong opisyal gi “convicted by public opinion” sigun pa sa usa sa mga abogado ni Boniel nga si Atty. Gerardo Carillo atol sa 888 Media Forum kagahapon.

Matud pa sa maong abogado nga nasubo siya sa mga nabasa niya nga mga opinyon sa mga tawo ilabi na sa social media nga nagpabuhagay sa ilang opinyon nga tinuod gyud ang gipasangil ngadto sa maong opisyal.

“It seems that our client has been convicted without being or having a fair trial. This is what we call ‘Conviction in Public opinion’. This is very sad in a democratic society like ours,” matud pa ni Carillo. Gihimug-atan usab niya nga naa sa Konstitusyon nga ang gipasanginlang tawo isipong inosente hangtud nga mapamatud-an sa korte nga sad-an.

Una nang namahayag si PRO7 Regional Director Noli Taliño nga bago na sa kampo ni Boniel nga pamatud-ang inosente kini sa pasangil batok kaniya. Lakip niini ang pagpamatuod nga tinuod ang ilang counter affidavit nga dakong buhi ang gikatahong gipusil patay ug gihulog sa dagat sa Caubian nga si Bien Unido Mayor Gisela Bendong-Boniel.

“Isn’t it contrary? Di ba the police should prove that the victim is found first? How can a parricide be a parricide without the body? Without declaring a person to be dead?” sumbalik pa ni Carillo.

Apan ang chief legal counsel sa kapulisan nga si Chief Inspector Eden Perera miingon nga ilang ipamatuod sa korte nga namatay gyud ang mayor ug ilang paninguhaon nga mahatagan og hustisya ang kamatayon niini.

Si Niño Rey gipasanginlang nipusil patay ug nitambog sa lawas sa iyang asawa nga si Gisela sayo ning buwana hinungdan nga gipasakaan siya og kasong parricide didto sa Dakbayan sa Lapu-Lapu.

Silang Reolito ‘Etad’ Boniel nga nagmaneho sa pumpboat ug duha ka mga drivers sa maong board member nga silang Randel Lupas ug Edgar Tapere ang naa karon gikustodiya sa kapulisan aron maoy mobarog isip saksi sa maong kaso.

Gipasakaan pud og kasong kidnapping ug serious illegal detention ang maong board member human siya gipasanginlan nga nitanggong sa bestfriend sa iyang asawa nga si Angela Leyson lakip na ang 17 anyos nga anak niini  sa Dive Camp sa Bien Unido.

Si Taliño malaumon gihapon nga makit-an ang patay’ng lawas ni Gisela maong gipadayon gihapon ang search and retrieval operation sa kadagatan sa Caubian.

“Probably this week ay tuloy-tuloy pa rin. Antayin natin ang recommendation ng search team,” matud pa ni Taliño. (BANAT NEWS)