Duha ka nurse gipatawag bahin sa kontrobersiya
CEBU, Philippines – Pangulo sa Committee on Discipline and Investigation (CODI) , Provincial Legal Officer Orvi Ortega, mibutyag nga nakaduso na og tubag si Dr. Bella Villaganas, chief medical officer sa Minglanilla District Hospital bahin sa pasangil nga wala niya ipagamit ang ambulansya sa nabiktima sa hit-and-run niadtong May 24.
Sumala pa ni Ortega nakigkita na kaniya si Villaganas kauban ang duha ka mga nurses niadtong Hunyo 21 pinaagi sa preliminary conference kabahin sa maong kontrobersya.
“Nakasumitir na si Dr.Bella Villaganas sa iyahang tubag kabahin sa katong reklamo nga gipasang-at sa iyaha, gani, katong Miyerkules, dia may preliminary conference na gipahigayon nga nitunga si Dr. Bella Villaganas, unya atoa sad gipatawag og apil ang duha ka nurse on duty,” matud pa ni Ortega. Giklaro hinuon ni Ortega nga ang tumong sa pagpatawag sa duha ka nurses mao ang paghipos og dugang impormasyon.
“Ang katong nurse nga lalaki, matud pa niya, ang katong iyahang tubag pinasikad lang gyud to sa iyahang pagsabot. Wala mag-mention sa memorandum ni Villaganas nga dili pwede gamiton. Gi-mention lang didto kung unsay mga priority nga gamit sa ambulansya pero wala mag-ingun nga di gamiton,” matud pang Ortega.
Sumala pa sa memorandum ni Villaganas ang priority functions kutob lang sa pagbalhin sa pasyente ngadto sa ubang tambalanan sa Sugbo; paghatud sa mga hospital personnel nga adunay business transactions Kapitolyo ug mga bangko; pagpalit og mga hospital materials; pagdala sa mga pasyente nga nagkinahanglan og laboratory and diagnostic procedures nga wala sa tambalanan sama sa X-ray ug chemistry tests sa City of Naga ug Minglanilla lang.
Sa sayo pa si Dr. Rene Catan, chief sa Provincial Health Office miingon nga sukwahi ang memorandum ni Villaganas sa mando sa Department of Health niadtong Enero 7, 2010.
Ang mando sa DOH nag-ingon: “Ambulance services is one of the vital health services for the delivery of pre- and post-hospital care to a sick patient or to an injured patient resulting from an emergency or a disaster.” - Gikan sa The Freeman/EIM
- Latest
