US Travel advisory bahin CV gipagawas
CEBU, Philippines - Mipagawas og travel advisory ang US Embassy sa Manila sa ilang mga kababayan nga gustong mosuroy o mobiyahe padung sa Central Visayas base sa matud pa “unsubstantiated yet credible” nga impormasyon nga adunay posibleng mahitabong kidnappings dinhi.
Kini bisan pa man sa gipagawas nga pamahayag sa Philippine National Police niadtong Biyernes nga way hulga ang nasud karong nagsingabot ang Semana Santa ug sa pagkasikop sa duha ka mga langyaw nga gipasanginlang sakop sa Islamic State of Iraq and Syria (ISIS) didto sa Taguig City.
Niadtong naghinapos nga bahin sa bulan sa Marso, ang Bureau of Immigration nisikop sa Kuwaiti nga si Husayn al-Dhafiri ug asawa niining Syrian nga si Rahaf Zina.
Ang duha matud pa nakaagi dinhi sa Sugbo sa ilang pagbiyahe-biyahe padung sa Mindanao.
Ang US Embassy mipakatap og mensahe sa ilang mga kababayan kabahin sa impormasyon nga adunay teroristang grupo nga mosuway paglusad og kidnappings sa Central Visayas apil niini sa Cebu ug Bohol provinces.
Niadtong nakalabay nga semana lang natapos ang gihimong ASEAN Ministerial meet sa Cebu ug sa Bohol.
Pipila ka buwan na ang nakalabay nag-isyu og susamang advisory ang US dinhi sa Sugbo samtang nagsingabot ang Miss Universe 2016.
Ang US maoy ikaduha sunod sa South Korea nga kinadaghanan og turistang mobisita sa nasud kada tuig. – Gikan sa Philstar.Com/EIM (BANAT NEWS)
- Latest