Drayber og habal-habal gipatay

CEBU, Philippines - Patay ang usa ka drayber og habal-habal nga nakaangkon og daghang dinunggaban sa liog ug ubang bahin sa lawas dihang nakit-an diha sa Upper Riles, Brgy Inayawan ning Dakbayan sa Sugbo.

Hangtod karon wala pa nailhan sa kapulisan ang biktima nga gituohang taga Dakbayan sa Talisay nga gituohan usa ka drayber sa habal-habal.

Sa imbestigasyon sa mga sakop sa Homicide Section sa Cebu City Police Office nga gipangulohan ni Senior Police Officer 2 Rommel Bancog  migawas nga may  usa ka Rex Alendon nga nakatug-an nga sa wala pa nahitabo ang kremin iyang nakita ang biktima nga sakay sa iyang motorsiklo nga XRM. Pagkataud-taod iyang nakita ang motorsiklo sa biktima nga gisakyan og usa ka lalaki nga nag-jacket, nagdala og knapsack, nagkalo ug kusog nga mipadagan palayo sa maong dapit.

Gihulagway sa mga polis ang biktima nga anaa sa 5’4 ang gitas-on, 20 hangtod 25 anyos ang edad, nagsuot og jersey nga dunay “PUMA” ug checkered ang short pants. - /EIM) (BANAT NEWS)