_banat
^

Banat Balita

Road rage nurse gipusil

Jojo Ugdol - Banat

CEBU, Philippines -  Nalandig sa tambalanan ang usa ka 33-anyos nga lalaking nurse human kini gipusil sa iyang paa sa iyang nakalalis sa trapiko sa dalan F. Sotto Street, Brgy  Kamputhaw ning Dakbayan sa Sugbo pasado alas 3 kagahapon sa kadlawon.

Giila ang biktima nga si Ephraim Nuñal, taga Dakbayan sa Talisay nga gidala sa Perpetual Succour Hospital sa laing motorista nga nakakita sa maong hitabo.

Ang biktima nakaangkon og samad pinusilan sa tiil ug paa sumala pa ni Police Officer 3 Nicolo Gonzales, imbestigador sa Cebu City Police Office Homicide Section.

Sa imbestigasyon sa kapulisan, si Nuñal nagmaneho sa iyang puti nga Toyota Altis diha sa F. Sotto Street kauban sa iyang higala sa dihang usa ka itom nga Mercedez Benz nga dunay plate number UWI-731  ang mihunong sa tunga sa kalsada.  Tungod niini, gisirbatohan kini sa biktima aron sila makaagi.

Apan nasuko na hinuon ang drayber sa Mercedes Benz ug migawas kini sa sakyanan dayon gisipa ang sakyanan sa biktima.

Sumala pa niini, ang suspetsado sulay pa nga misumbag sa biktima apan wala kini nakaigo maong nibalik kini sa iyang sakyanan ug silang duha nagkaatubang ug nagtinubagay hangtud nga gipusil sa maong lalaki si Nuñal duha ka higayon.

Human sa pagpamusil dali nga misakay sa sakyanan ang suspetsado kauban ang usa ka babaye dayon sibat.

Ang CCPO- Homicide Section nakadawat og kopya sa usa ka video nga nakakuha gyud sa aktwal nga pagpamusil diin nagpakita sa suspek nga nagsuot og puti nga t-shirt ug itom ang pantalon kauban ang usa ka babaye nga nagsuot og buwak-buwakon nga bestida.

Makita sab sa video nga naglalis pa ang duha ayha pa nahitabo ang pagpamusil, makita usab sa video nga gipugngan pa sa babaye ang suspek apan gipusil gihapon ang biktima.

Sa hospital kagahapon, si Nuñal nitug-an sa mga tigbalita nga hubog ang drayber kay iyang nakita nga nag zig-zag ang dagan sa sakyanan niini nga iyang nasundan.

“Naghunong hunong,  eventually ni busina ko.  Nihunong siya sa tunga gyud. Nigawas siya, suko siya. Nigawas sad ko ako siya giingnan  nga move kay moagi mi, so don’t block the way,” matud pa ni Nuñal.

Sa crime scene nakuha sa mga polis ang duha ka basiyo sa .22 caliber nga bala, usa ka bala ug slug ug duna sila’y nadawat nga impormasyon nga ang maong lalaki sakop sa usa ka adunahang pamilya dinhi sa Sugbo.

Kaso nga frustrated homicide ang ipasaka batok sa suspetsado sigun pa ni Gonzales.

Samtang si Cebu City Mayor Tomas Osmeña, pinaagi sa iyang Facebook page, mipahibalo nga mohatag kini og reward money kantidad og P100,000 sa makahatag og impormasyon aron madakpan ang suspek, kadtong mohatag og impormasyon mahimong motawag sa telepono sa CCPO Homicide Section at 032 266 5494. - /EIM) (BANAT NEWS)

 

EPHRAIM NUñAL
Philstar
  • Latest
Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with