Fil-Jap, GRO, 8 sikop sa buy-bust

CEBU, Philippines -  Unom ka tawo ang nadakpan sa managlahing buy-bust operation sa Dakbayan sa Lapu-Lapu niadtong Biyernes. Pasado ala una sa hapon nasikop ang usa ka Filipino-Japanese nga si Marcelino Takeuchi, 37, sa Seabreeze, Mactan.

Matud ni Police Senior Inspector Joey Bicoy, deputy chief sa Lapu-Lapu City Police Office-City Intelligence Branch, nga si Takeuchi, kinsa residente sa maong dapit, nakuhaan og unom ka gagmay’ng putos sa gituohang shabu og P500 nga halin.

Sa laing bahin, tulo ka tawo ang natumbok sa LCPO-Station 3 sa Purok Thunder, Barangay Babag sa alas 5:50 sa hapon sa maong adlaw.

Matud ni Chief Inspector Jaime Tolentin nga gidakop nila ang main subject nga si Demetrio Dungog, 44, ug gisakmit ang unom ka putos sa shabu.

Nasikop sab si Eduardo Aquino, 26, silingan ni Demetrio, dihang nipalit kini og shabu dungan sa transaksiyon sa police decoy. Nisuway sa pag-ikyas si Demetrio apan nadakpan gihapon sa polis.

Gidakop sab si Gleen Dungog, 34, human nakit-an nga padulong mosuyop sa usa ka sachet sa shabu.

Subay sa laing operasyon gidakop sab sila si Allan Mangubat, 53, ang main subject, ug ang 21-anyos nga KTV bar entertainer nga si Angefe Alesna, sa Purok Lemonsito, Gun-ob sa alas 3:55 sa hapon. Si Alesna nakuhaan sa akto nga padulong mosuyop sa usa ka sachet sa shabu.

Unom ka sachet sa shabu ang nasakmit gikan kang Mangubat.

Samtang nasikop sa managlahing operasyon sa Lungsod sa Liloan, Cordova ug Dakbayan sa Mandaue ang gidudahang pusher ug nasakmit ang mokabat sa P200,000 nga kantidad sa shabu.

Sa Sitio Lantugi, Buagsong, Cordova nadakpan ang duha ka gidudahang pushers nga sila si Antonio Macan, 38, ug Wilson Salazar, 30, drayber sa PUJ.

Si Police Officer 2 Vilma Degamo niingon nga unang nasakmit gikan sa duha ang duha ka gagmay nga pakete sa shabu ug dihang girekisa maoy nakuha ang lima ka medium-size sa gidudahang shabu ug P400 nga marked money. Nadakpan sab ang laing pusher   og shabu nga nitahan na sa Oplan Tukhang sa kapolisan sa evacuation camp sa Cebu International Convention Center sa Dakbayan sa Mandaue alas 12 pasado sa udto sa niaging adlaw.

Si Police Officer 2 David Omambac sa Presinto 1 sa Mandaue City Police Office, niila sa nadakpan nga si Fidelo Gastador Capisnon, 32, taga Bagay, Daanbantayan apan kasamtangang nagpuyo sa CICC tungod kay usa kini sa mga biktima sa sunog.

Nasakmit gikan sa dinakpan ang tulo ka pakete sa shabu ug P300 nga marked money. Sa laing bahin, si Senior Police Officer 2 Bryan Batiquin sa Liloan Police Station, niila sab sa ilang dinakpan nga si Harold Regie Corbo, 28, ulitawo nga nagpuyo sa Purok Saluwag, Calubihan sa maong lungsod. Nasakmit gikan niini ang 18 ka gagmay nga pakete sa gidudahang shabu ug marked money. Christell Fatima M. Tudtud ug Romeo T. Limpangog  (BANAT NEWS)