Pabling buot ang trans-axial madayon

CEBU, Philippines - Uyon si kanhi gobernador Pablo Garcia sa kaugmaran sa trans-axial highway.

Kini human gikataho nga dili na maayong ipadayon ang proyekto tungod kay makaguba lang kini sa watershed sa kabukiran nga maagian sa karsada.

Matud ni Garcia nga una na niyang gipaugmad ang 55-kilometros nga vegetable highway gikan sa Guadalupe, Dakbayan sa Carcar paingon sa Mantalongon, Dalaguete nga mao unta ang sumpayan sa trans-axial highway.

Alang kang Garcia ang panginahanglan sa tawo ang labing bug-at kaysa kalikupan apan kinahanglan nga dunay himoon nga dili kini madaut.

Gipasabot ni Garcia nga walay kaugmaran nga gihimo nga dili makaapekto sa kalikupan hinungdan nga kinahanglan ang pagtimbang-timbang kung unsa ang angayang buhaton nga gamay lang ang kadaut nga mamugna.

Gisanglitanan ni Garcia ang pantalan sa Sugbo nga mao karon ang labing busy nga pantalan sa nasud diin kaniadto usa ka pagatpatan nga gipangputol aron ugmaron.

“If you want to live with nature, kanang mga trees all around, waters are clear, you go to Central Africa and live like Tarzan,” matud ni Garcia. (BANAT NEWS)