Anak tigtunol, amahan tig-repack

CEBU, Philippines - Nasikop ang anak sa gidudahang pusher samtang nakasibat ang amahan dihang girumbo sa kapolisan sa Dakbayan sa Talisay ang ilang panimaye sa Molave Extension, Barangay Lagtang niadtong niaging adlaw.

Ang nasikop mao si Giovannie Campo alyas Jojo, hingkod, samtang ang iyang amahan nailhan nga si Socrates Campo alyas Katis.

Sila si Supt. Aileen Recla, hepe sa kapolisan sa Talisay, ug kaubanan ang nakadawat og impormasyon labot sa ilegal nga kalihukan sa amahan ug anak hinungdan nga gihimo ang operasyon.

Dihang nakigsabot na si Jojo sa poseur buyer nga babaye ug nitunol sa shabu, dali nilang gikwelyuhan apan ang amahan nga nag-repack sa mga shabu ang dali nga nakadagan.

Nakuhaan og walo ka gagmay nga pakete sa shabu si Jojo samtang nasakmit sab sa mga awtoridad ang duha ka dagku nga pakete sa shabu nga gi-repack ni Katis ug aduna pay laing tulo ka gagmay nga pakete.

Ang tanan nitimbang og 1.93 gramos nga gibana-banang mokantidad og kapin P22 mil.

Si Jojo kinsa gibalhug na sa bilanggoan ang gipasakaan na og kaso lakip na ang iyang amahan nga nakasibat.

Gisaka

Patay ang giilang adik sa paggamit og ilegal nga drugas dihang gisaka kini sa iyang panimalay sa armadong lalaki sa Sitio Nawanao, Subangdaku, Dakbayan sa Mandaue alas 9 pasado sa niaging gabii ug gipusil samtang nagtan-aw kini og salida sa telebisyon.

Si Senior Police Officer 1 Michael Limalima, sa Presinto 2 sa Mandaue City Police Office, niila sa biktima nga si Amado Colina, 44-anyos, ulitawo ug walay trabaho nga nagpuyo sa maong dapit.

Matud ni Limalima nga nahidangat sa maong dapit ang duha ka wala hiilhing lalaki nga nagsakay og violet nga motorsiklo nga pulos nag-helmet og close-type.

Ang angkas maoy nisulod sa panimalay ug nipusil sa biktima sa makadaghang higayon.

Matud ni Limalima nga ang namatay ilang gipaubos sa Oplan Tukhang apan wala gyud kini mopakita sa ilang buhatan.

May warrant

Nadakpan sa kapolisan ang usa ka tawo nga may warrant of arrest sa East Binabag, Tayud, Consolacion alas 10 pasado sa niaging gabii.

Si Police Officer 1 Retchie Gilleran sa Consolacion Police Station niila sa nadakpan nga si Rommel Lauron, 31-anyos, nagpuyo sa maong dapit.

Ang hepe nga si Senior Inspector William Humoc maoy nangulo sa pagdakop sa akusado pinasikad sa warrant of arrest nga giluwatan sa Branch 56 sa Regional Trial Court (RTC) 7 sa Dakbayan sa Mandaue sa kasong paghupot ug pagbaligya og ginadiling drugas. Matud ni Gilleran nga wala motahan sa ilang buhatan ang dinakpan ubos sa Oplan Tukhang.

Wala hinuon mopakita og pagsukol ang akusado dihang gidakop ug gibalhug na karon sa detention cell sa kapolisan. Gabriel C. Bonjoc ug Romeo T. Limpangog (BANAT NEWS)