Batang nanginhas naanod nalumos
CEBU, Philippines - Bata nga nanginhas naanod sa sapa ug nalumos diha sa Sitio Punong, Brgy. Ticad sa lungsod sa Bantayan.
Ang namatay mao si Mix Oreo Rivera, 9, kinsa nakit-an na lang nga nagkulob na sa bakhawan kagahapon sa buntag.
Giingong nanginhas ang biktima kauban ang duha pa ka batang ig-agaw sa bakhawan nga kinahanglan pang tabukon og sapa.
Sumala pa nga padung na mopauli ang mga bata niadtong higayona, apan sa pagtabok pa lang niini, naanod kini hinungdan nga wala na mopadayon paglabang ang duha niini ka mga kauban.
Nahibulong ang mga ginikanan sa mga bata kun nganong wala kini mauli maong midangop sila sa Bantayan Police station aron magpatabang sa pagpangita kanila.
Nakit-an ang duha ka bata nga wala na molabang ug misumbong bahin sa nahitabo kang Rivera.
Si Melton Salimbanot Tinga, usa sa mga nitabang sa pagpangita maoy nakakaplag sa bata dihang iyaha kining natamakan sa kalapokan sa fishpond.
Gidala pa nila kini sa Bantayan District Hospital apan patay na kini. Nakita usab nga adunay daghang garas sa panit ang bata apan ang pagkalumos maoy hinungdan sa pagkamatay. (BANAT NEWS)
- Latest
