Nasunugan sa Estancia tabangan, di na pabalikon

CEBU, Philippines - Mohatag og tag P25 mil nga financial assistance sa mga biktima sa sunog sa Ibabao-Estancia, Dakbayan sa Mandaue ang tag-iya sa luna.

Matud ni Barangay Kapitan Carmelino del Mar nga 83 ka pamilya ang makadawat sa hinabang sa kondisyon nga mopirma sila sa kasabutan nga dili na sila mobalik sa luna nga nasunugan.

Ang kagamhanan sa dakbayan mohatag usab og P10 mil matag pamilya nga nasunugan.

Makadawat usab ang mga biktima og hinabang gikan ni Kongresista Gabriel Luis “Luigi” Quisumbing sa tag P4 mil matag pamilya.

Si del Mar niingon nga madugay-dugay hinuon ang mao’ng tabang.

“Dili na makuha dayon kay kinahanglan pa man na’ng i-process, although within two months at least naa sila`y mapaabot kay sa wala gyud, maayo na lang kaayo na para puno-puno sa ila’ng gastuhanan sa umaabot nga mga adlaw,” matud ni del Mar.

Si Evangeline Prada, usa sa biktima, niingon nga nalipay sila sa mao’ng hinabang apan naproblema gihapon sila kun asa sila mopuyo kay hangtud karon wala pa sila`y kabalhinan.

Nagkanayon si Prada nga nakadawat hinuon sila og hinabang gikan sa Department of Social Welfare and Development (DSWD) apan sa pagkakaron naproblema sila tungod kay walay ihatag nga relocation site para ila’ng katukuran og balay sa mga nasunugan.

Nagpasalamat si del Mar sa tanang nitabang sa mga biktima kay wala sila kaayo maglisud sa pagpakaon.

Dugang ni del Mar nga sa pagkakaron abunda pa hinuon ang mga biktima sa ila’ng adlaw-adlaw nga kinahanglanon.  (BANAT NEWS)