Asawa sa retiradong polis gilabnihan

CEBU, Philippines - Gilabnihan sa bag ang asawa sa retiradong opisyal sa kapolisan samtang nagsakay og pasaheroang jeep sa Lawaan 1, Dakbayan sa Talisay niadto’ng Domingo sa gabii.

Ang biktima mao si Lizbeth Abalo, 50-anyos, usa ka medical technologist, taga Crosan, Bulacao, sa mao’ng dakbayan.

Ang manglabnihay gihulagway sa biktima nga medium built; 5'4" ang gitas-on, adunay bungot nga nagsul-ob og ball cap nga dark color.

Ang biktima asawa ni retired Chief Insp. Isagani Abalo.

Si PO3 Ferdinand Pablo sa Talisay City Police Station nagkanayon nga gikan sa Lungsod sa Minglanilla ang biktima dihang kalit nga gilabni ang iyang bag.

Asoy ni Pablo nga ang biktima nagduda nga konsabo ang drayber sa jeep nga iyang gisakyan tungod kay imbis nga siya tabangan pinaagi sa pagpakusog sa iyang dagan aron dili makaikyas ang manglabnihay, naghinay-hinay na hinuon kini hangtud nga sayon ra nga nakaambak.

Sulod sa bag sa biktima ang iyang cellphone; kwarta nga P3,200; tseke ug uban pa’ng mga importante’ng butang.

Matud ni Pablo nga ang biktima wala nakatudlo sa mga kawatan gikan sa mga litrato sa rouges gallery hinungdan sa iyang pagduda nga gikan sa laing lugar ang responsable.

Iya gihangyo ang biktima sa paghinumdum sa plate number sa jeep aron pangutan-on kalabot sa pasangil. (BANAT NEWS)